Science and Technology
身上嘅脂肪去咗邊?

一個美好的星期天早上,天氣清涼、稍有陽光,小新一家人出奇地沒有睡到日上三竿,反而穿著一身運動服裝到運動場,準備去跑步!可是,有人歡喜有人愁。

「做乜一大清早叫醒人跑步喎,啱啱仲發緊夢同靚姐姐拍拖食飯架嘛!」小新埋怨道。
「你大多廿年先好發呢啲夢得唔得呀?依加要做嘅呢,係好好為嚟緊嘅夏天做好準備,Keep返fit個身型,唔係點著比堅尼去海灘曬太陽呀?」美亞一面做熱身一面說。
小新反駁:「肥師奶著比堅尼?你都係唔好做無謂嘅掙扎喇!」
最近胖了兩公斤的美亞被激發:「你話邊個係肥師奶話?哼!一陣等我跑多幾個圈,啲脂肪就會變成能量!到我跑走晒啲脂肪瘦返之後,咪同你夢入面個靚姐姐差唔多咋嘛!」
小新幻想靚姐姐變成美亞的樣子後,大聲求救:「大叔呀!你老婆破壞咗人地個美夢呀!」

廣志大笑:「哈!唔好諗咁多先!跑下步、做下運動其實真係可以健康啲同keep fit架,不過講身上面嘅脂肪變咗做能量嘅話,就唔係咁啱喎!」
美亞驚訝:「吓!唔係變咗做能量,咁啲脂肪變咗做咩呀?」
小新一邊谷起「老鼠仔」,一邊插咀:「我知,一定係變咗做我啲肌肉喇!」

廣志解釋:「NoNoNo! 其實我地平時講開嘅脂肪,當中包括一種叫做三酸甘油酯(Triglycerides)嘅物質;當我地食得太多,吸收多咗嘅營養就會轉化成三酸甘油酯,再以呢個形態積聚喺脂肪細胞入面。當我地去做運動減肥,其實就係想加快代謝依啲三酸甘油酯,將佢地分解成為二氧化碳同水。」
美亞追問:「咁用咩分解啲脂肪呀?」
小新繼續谷起「老鼠仔」,自得其樂地說:「就係用我強勁嘅臂彎!」
廣志沒有理會小新,繼續解釋:「簡單啲嚟講,就係氧氣。有專家計過條數,10公斤嘅脂肪大約需要吸入29公斤嘅氧氣,去製造出28公斤二氧化碳同11公斤水!二氧化碳就會透過肺部呼氣呼走咗,而水就經由尿尿同流汗等等排出體外。」
美亞恍然大悟:「原來係咁,啫係啲脂肪其實係經個肺離開個身體,個人先至會輕咗!」
廣志苦笑:「er…你都可以咁去理解嘅!」

小新疑惑:「咁平時我地吸大啖啲氣咪得囉,做乜要迫人跑步喎!」
廣志笑道:「唔得咁架,如果你換氣過度,多過你新陳代謝嘅需要,反而對身體唔好,仲好易會暈添!所以做運動,就係其中一種主動增加新陳代謝嘅做法喇!」
「咁仲唔快啲跑多幾個圈,件比堅尼等緊我架!Come on!」美亞說罷便一個箭步起動了。
小新兩父子唯有一邊跟著慢跑,一邊惺惺相惜地道:「喂呀,點解依個肥師奶係要迫人睇佢著比堅尼啫?」
「放心啦,唔會架,以佢嘅性格,跑半個圈就嗌攰架喇,點會減到肥啫?著到佢上年買嗰條牛仔褲先再講啦!」


資料來源:
http://www.iflscience.com/health-and-medicine/where-does-your-fat-go-when-you-lose-weight/
http://www.livescience.com/49157-how-fat-is-lost-body.html

相片來源:
http://greatist.com/running


Contact Us

Address : Room 211, 2/F, Lakeside Two, East Wing Phase Two, Hong Kong Science Park Pak Shek Kok, New Territories

Tel : 2561 6149
Fax : 2565 8345
Email : ccst@hkfyg.org.hk

Directions

Science Courses Enrollment