Science and Technology


13 / 10 / 2017

大雄同靜香繼上次賞過櫻花、食過車厘子之後,今次嚟到暑假,又係一年一度食桃嘅季節,啱啱佢地正經過一間生果舖。

靜香:大雄你睇下,今期 D 桃又大又靚呀!

大雄:係喎,仲有唔同顏色添,有紅色嘅水蜜桃,又有白色嘅白桃。

靜香:嗰邊仲有一款紅色無毛嘅,你又知唔知係咩嚟?

大雄:想考我?冇咁易,呢隻係桃駁李丫嘛,顧名思義,係桃樹同李樹駁埋嘅雜交品種。

靜香:咁你就錯喇,的而且確佢地係桃駁李,但係唔係桃同李嘅混種嚟架!

大雄:吓?桃駁李桃駁李,由細到大都係咁叫架啦,唔係桃駁左李,仲可以係咩?

靜香:呢個只係一般人錯誤嘅理解,由於桃駁李嘅表皮唔似一般桃咁有毛,而係類似李,即係布冧咁光滑,所以大家就當咗佢係兩者嘅混種啦。事實上,根據 DNA 分析,桃同桃駁李其實係同一品種,佢地嘅分別係在於控制果實表皮嘅等位基因,顯性嘅基因令到表皮有毛,而隱性嘅基因就令到表皮無毛。

大雄:等位基因?係咪有等位基因嘅人先有耐性飲茶要等位?

靜香:梗係唔係啦!等位基因係指控制某個特徵嘅基因,有超過一款嘅基因型,而不同嘅基因型就會決定相對應嘅表現型;情況就好似我地同樣都有好多款控制眼睛顏色嘅等位基因,唔同嘅等位基因組合,就可以令到有 D 人眼睛係黑色,有 D 人係啡色,有 D 人係藍色咁。

大雄:哦!原來係咁!咦?我地都係唔好喺呢度買桃啦,呢間黑店嚟架,呢D俾人踩扁嘅桃都夠膽拎出嚟賣嘅?

店主:喂!你唔識嘢就唔好亂講喎!呢 D 係西班牙嘅扁桃嚟架!走呀!唔做你生意呀!

靜香:唔好意思呀!佢讀得書少,讀極都唔識!(對大雄講)快 D 逃走啦,不過呢,嗰 D 唔係真係叫扁桃喎,呢個只係大家嘅誤解!呢種應該係叫蟠桃,係桃嘅一個變種,只不過佢扁tat tat,D 人先叫佢做扁桃!

大雄:係?咁我返轉頭同佢打過先!根本呢個世界就無扁桃,佢先至唔識嘢呀!

靜香:算吧啦你,呢個世界係有扁桃架,只不過唔係指頭先見到果 D 橙黃色又扁 tat tat 嘅桃啫!你都食過扁桃架喎!

大雄:係唔係我果日跌咗落地,唔覺意踩左一腳都照樣執返嚟食嗰個桃呀?

靜香:吓?我明明叫你唔好食架喎,你咁污糟架…

大雄:食得唔好嘥丫嘛…

靜香:(反眼)講返正題,平時我地食桃係食果肉嘅部分,但如果食扁桃呢,我地就係食佢嘅種子嘅,亦即係杏仁。

大雄:哦!哦!哦!今日真係學到好多嘢呀!點解你咁叻嘅?

靜香:我反而想知當初自己點解會揀你而唔揀出木杉同學呀!

大雄:呢個我知!因為我夠傻咯!

靜香:……(反眼 X 10000)

   桃    桃駁李

   蟠桃    扁桃 (杏仁)

資料來源:
https://en.wikipedia.org/wiki/Peach
http://web.archive.org/web/20080714065820/http://food.oregonstate.edu/faq/uffva/
nectarine2.html

https://en.wikipedia.org/wiki/Saturn_Peach
https://en.wikipedia.org/wiki/Almond

06 / 10 / 2017

志明同春嬌都有一段時間冇出街拍拖,難得今日兩個都放假唔使返工,佢地就決定要做一件好耐冇做而又青春嘅事,就係掃街喇。

出到旺角街頭,春嬌見到美食在前,不禁流哂口水,先後已經食咗佢至愛嘅臭豆腐同埋咖哩魚蛋。

春嬌:食食下開始好口渴添,不如去買嘢飲啦。
志明:你想飲咩呀?係唔係珍珠奶茶呀?
春嬌立時表現驚慌:緊係唔飲珍珠奶茶啦!飲完可能會死得快d!

志明一臉疑惑:好地地飲個奶茶啫,點會死呀?
春嬌:你有冇常識架?飲得多奶茶係會生腎石架。
志明一臉無奈:你先至冇常識呀!呢個只係謠言嚟架咋,唔係真架。
春嬌:謠言?明明網上面睇到d人話茶葉入面有草酸,同鮮奶入面嘅鈣質混合之後會喺腸道產生草酸鈣架喎。
志明:係,你講嘅野係無錯嘅。的確鮮奶同茶葉混合嘅時候係會產生草酸鈣,而腎結石主要係由草酸鈣(CaC2O4, calcium oxalate) 所組成。不過,草酸鈣其實唔係咁容易被消化管道吸收同埋溶解架,所以佢係唔會殘留喺體內,通常都會同啲便便一齊排出體外。
春嬌猶如恍然大悟:chur……等我仲放棄咗我最鍾意嘅珍珠奶茶咁耐添。
志明繼續努力解釋:同埋其實邊有咁多鮮奶俾你飲丫,好多時D舖頭都係用奶精粉調配嘢飲架咋,邊有咁多鈣質俾你喎。
春嬌:係咁架咩?真係唔會知囉!不過都好嘅,即係可以飲返啦!
志明:不過,如果你想自己整鮮奶茶,就要留意返喇。如果攝取過量草酸,係會影響鈣、鎂、鉀等礦物質嘅吸收架。所以如果你真係要整,就要揀d 唔好太濃嘅茶。如果唔係,草酸濃度太高,奶入面嘅鈣質就唔能夠完全被吸收架喇。
春嬌:你第一日識我咩?我唔煮嘢食架喎,我咁懶都唔會自己整嘢嚟飲架啦。出面咩都有得賣,使鬼自己整咩!
志明:我知!唔買嘅話你就實會叫我沖俾你飲,你永遠都係女王丫嘛。
春嬌:咁叻嘅你!BB,咁而家買得嘢飲未呀?我要飲前面最出名嗰間珍珠奶茶呀!
志明:其實我未講完架,雖然你頭先講嘅嘢唔完全正確,但係真係有D 食物唔可以亂咁撈埋一齊食架,例如對於一啲腸胃較弱嘅人,柿同蟹就盡量唔好一齊食喇,又例如……
春嬌:Stop!呢D你知咪得囉,平時都係你負責煮,我負責食架啦!唉呀,BB 我真係好口渴要搵嘢飲喇,我仲有好多嘢未食架,煎釀三寶啦、雪糕啦,全部都未食!
志明:好啦好啦,俾你食喇,肥咗唔好又喺度話要減肥呀!

之後........春嬌就自己一支箭咁飛走咗,完全無視喺身旁嘅志明。

資料來源:
http://highscope.ch.ntu.edu.tw/wordpress/?p=3016
https://zh.wikipedia.org/wiki/%E8%85%8E%E7%B5%90%E7%9F%B3

相片來源:
http://unjifwis8hngii.blogspot.hk/2015/12/blog-post_64.html

29 / 09 / 2017

小丸子:「小玉,你睇下果棵樹幾大,啲根生到出哂地面!」

小玉:「你知唔知啲根有咩用呢﹖」

小丸子:「咪用嚟吸下水,吸收下泥土嘅養分囉,仲有咩用呀?」

花輪同學:「其實樹根仲可以用嚟溝通架﹗BABY~~」

小丸子:「吓,溝通?!佢地冇口又唔識郁喎,點溝通呀?」

小玉:「小丸子,我地平時咪用互聯網同身處世界各地嘅朋友傾計嘅,其實樹與樹之間都會透過一個特別嘅網絡交流架。」

花輪同學:「冇錯啦!呢個溝通網絡叫真菌網絡(mycorrhizal network),係由樹嘅根部同泥土中嘅真菌(fungi) 互相連繫而成。樹會透過真菌網絡分享資源,互相幫助生長,而唔係只為咗生存而競爭架。BABY~~」

小玉:「講得無錯呀~其實森林生態學家都做過關於兩棵唔同種類嘅樹之間輸送養分嘅研究,當佢哋搵嘢遮住其中一棵樹,令到依一棵樹得唔到足夠陽光進行光合作用嘅時候,另一棵樹就會透過真菌網絡將自己製造出嚟嘅碳基糖(carbon-based sugars) 經由根部傳送過去,令嗰棵被遮蔽嘅樹都可以繼續生存。」

小丸子:「原來樹與樹之間真喺會有溝通架喎,而唔係地面上所見,棵棵樹都獨立生長嘅。除咗分享資源,佢地仲會『傾』咩呢?」

小玉:「除咗輸送養分,其實樹與樹之間亦會傳遞防護信息。當一棵樹受到害蟲侵襲嘅時候,佢會透過真菌網絡傳送化學信號比附近嘅樹,及早通知佢地有害蟲入侵,令鄰近嘅樹可以提升防禦力,整多啲防禦酵素(defense enzymes) 去抵禦害蟲。」

小丸子:「講咗咁耐都係樹與樹喺地底嘅交流,其實植物又會唔會喺地面都有溝通嘅呢?」

花輪同學:「都有架﹗BABY~~有啲植物受到害蟲侵襲嘅時候,會釋放出揮發性有機物(volatile organic compounds),例如茉莉酸甲酯(methyl jasmonate) 到周圍嘅空氣,當附近嘅植物接觸到呢類化學物質之後,就會作出適當嘅防衛。呢種化學物質仲可以吸引捕食害蟲嘅動物幫手清理害蟲添。」

小丸子:「原來係咁!今日真係長知識呀!樹與樹之間睇落好似無咩接觸,但原來都會有獨特嘅方式溝通,只係我地睇唔到同感受唔到啫!如果我哋都用到呢種真菌網絡進行地底嘅交流,咁考試嘅時候就一定得心應手喇」

小玉:「小丸子......」


資料來源:
http://www.abc.net.au/science/articles/2015/05/20/4236600.htm
http://www.the-scientist.com/?articles.view/articleNo/38727/title/Plant-Talk/
http://www.shs.edu.tw/works/essay/2012/03/2012033012383503.pdf

相片來源:
https://ec.europa.eu/jrc/sites/jrcsh/files/styles/normal-responsive/public/fotolia-92027264european-day-forest-green-forest.jpg?itok=MwdU0DK-

22 / 09 / 2017

嬌姐同志霖一齊去動物園遊覽,遊覽期間巧遇大象分娩嘅奇妙時刻。

 

嬌姐:你睇!隻象仔個頭出嚟喇!

 

志霖:係喎係喎!我都係第一次見到動物生BB架咋!

 

嬌姐:自然界真係好奇妙呀!考下你丫,哺乳類動物同其他動物繁殖嘅方法有咩唔同?

 

志霖:好簡單啫,鳥類、爬蟲類嗰D就生蛋嘅,哺乳類動物就全部都係胎生架嘛!

 

嬌姐:個個都胎生,唔通個個都想胎生咩?

 

志霖:吓?即係點呀?唔係所有哺乳類動物都係胎生咩?雖然我唔知佢地想唔想。

 

嬌姐:梗係唔係啦,正確答案係所有哺乳類動物都係胎生,除咗兩種係卵生嘅。

 

志霖:咁古怪?究竟係邊兩種,同埋喺邊度搵到佢地架?

 

嬌姐:呢兩種動物都係可以喺澳洲搵到,同屬單孔目,佢地就係鴨嘴獸同埋針鼴。單孔目動物嘅一大特點係,佢地嘅尿道、肛門同產道並唔係分開嘅,所以排泄同生蛋都係經泄殖腔,結構同鳥類、爬蟲類相似。正因為咁,科學家研究單孔目演化史嘅時候,發現佢地喺早期年代已經同其他哺乳類動物分開,所以係屬於較原始嘅哺乳類動物。

 

志霖:咁都幾特別喎,單孔目仲有無咩方面係唔似其他哺乳類動物架?

 

嬌姐:當然有啦,除咗少數品種嘅海豚以外,單孔目係唯一一類哺乳類動物可以感應到水中小動物肌肉收縮時所產生嘅微電流,呢種特殊技能可以幫助佢地覓食時更準確咁探測到獵物嘅位置。

 

志霖:嘩,咁犀利!咁咪好似有D鯊魚咁囉?

 

嬌姐:係呀!因為鴨嘴獸同針鼴都係夜行性動物,好多時視力對佢地嚟講都未必好有用,所以就發展出呢種特殊技能。仲有呀,鴨嘴獸嘅後腳有一根刺,而且雄性嘅鴨嘴獸更會分泌出毒液,係少數有毒嘅哺乳類動物嚟架!。

 

志霖:D鴨嘴獸個樣奇奇怪怪咁,原來仲要有毒添!

 

嬌姐:個個都奇怪,唔通個個都想奇怪咩?唔止你呀,當年有人見過鴨嘴獸之後將佢畫咗出嚟,其他人睇到都覺得好古怪,仲以為係一個惡作劇,將鴨嘅喙擺咗落隻河狸度添!

 

志霖:見到個樣同聽埋佢啲特徵,都真係覺得鴨嘴獸係由幾種動物拼埋一齊喎!By the way,嬌姐你又開始語無倫次喇,不如我早D送你返屋企啦!

 

嬌姐:個個都返屋企,唔通個個都想返屋企咩?

 

志霖:……

 

 
   

 

參考資料:

https://www.flickr.com/photos/ausemade/63738979

https://en.wikipedia.org/wiki/Platypus

https://en.wikipedia.org/wiki/Echidna

 

 

16 / 09 / 2017



維尼同小豬好忙咁佈置屋企,準備今晚同跳跳虎慶祝生日。
維尼:「我哋要快手 D 喇! 仲有好多嘢要準備!不如我去煮嘢食,你就去幫我吹 D 氣球,然後掛起佢啦~」
小豬:「好呀!我要食熱狗啦、燒賣啦、pizza 啦、意粉啦、雞翼啦‧‧‧」
維尼:「依家究竟係同你定同跳跳虎慶祝生日呀?成日掛住食!」
小豬:「你唔醫飽我個肚我就會冇力,只可以攤喺到,咩都做唔到架喇~」
維尼懶理瞓喺地嘅小豬,轉身入廚房準備食物。
話咁快廚房已經傳出陣陣香味,小豬急不及待跑入廚房諗住偷食。正當小豬伸手將隻雞翼放入口中之際…
維尼拍一拍小豬嘅手:「唔係俾你依家食架!你肚餓就攞個橙出去食啦!」
小豬:「我諗住幫你試味丫嘛!」
維尼繼續專心準備食物,突然間大廳傳出兩下「啪!啪!」的巨響。
面青青的小豬喊住咁跑入廚房:「維尼!屋企有鬼呀!你跟我出嚟睇下!」
小豬:「我頭先係檯面搣橙,跟住旁邊 D 波波唔知點解自己爆開晒呀!嗚嗚~」
維尼:「你唔好喊住先啦!俾你睇段片等你開心返先啦!」
(大家依家都可以一齊觀看以下短片:
https://www.youtube.com/watch?v=M3K6aESmgxg
小豬抺乾兩行眼淚:「點解 D 氣球會自己爆嘅?」
維尼:「因為橙皮裡面含有一種有機溶劑,叫做檸烯(limonene),呢種物質可以溶解氣球裡面嘅橡膠。頭先你搣橙嗰陣,唔小心將 D 檸烯彈到旁邊嘅氣球,氣球接觸到檸烯後就會溶解,所以咪好似自己識爆咁囉!」
小豬:「嚇死我喇,我以為踏入農曆七月…」
維尼:「都叫你唔好成日睇咁多鬼片架啦,又要驚又要睇,你今晚唔好又靜靜雞走過嚟我間房到瞓添呀,我踢你落床架!」
突然門鐘「叮噹!」一聲,小豬嚇到彈起,維尼好冷靜咁去開門。
「我哋隔離屋聞到好大陣燶味呀,你哋係咪煮緊嘢食呀?」
小豬:「呀!我哋個蛋糕呀!」
就係咁,維尼同小豬就繼續手忙腳亂咁準備跳跳虎嘅生日會 lu ~

參考資料:
https://news.mingpao.com/pns/%E6%A9%99%E7%9A%AE%E5%BC%84%E7%88%86%E6%B0%A3%E7%90%83%EF%BC%9F/web_tc/article/20141001/s00005/1412102888959
https://read01.com/zh-hk/87d6m2.html#.WaOCZD4jH3i
https://www.youtube.com/watch?v=M3K6aESmgxg

相片來源:
http://farm6.staticflickr.com/5009/5348425655_7a15bcfc7a_z.jpg

11 / 09 / 2017

「夏日炎炎,最啱就係食西瓜消暑解渴,想知點揀起沙嘅西瓜?等發嫂話你知啦!」貼近潮流嘅發哥最近都開始玩直播,依家正影住發嫂背面跟佢去買西瓜。
去到超級市場,發嫂已經九秒九搵到目標,拎起其中一個西瓜擺近耳邊。
「難道發嫂用耳仔揀西瓜?」發哥一邊偷笑,一邊拎起另一個西瓜嘗試模仿發嫂。
影片裡頭我地只見發嫂輕輕拍西瓜表面,然後就換另一個西瓜再重覆輕拍。換咗三四個之後,發嫂拎返起最初個西瓜放入購物車。呢個時候,發哥忍唔住問:「其實你聽到啲咩?」
「講俾你聽你都唔理解架啦!嗱!返到屋企你做個小實驗,拎兩隻玻璃杯,一隻裝滿水而另一隻裝滿沙。之後你嘗試敲打呢兩隻杯聽下佢地發出嘅聲就會明啦!」發哥向鏡頭做咗個鬼臉繼續問。
「聽落似係同振動頻率有關咁喎?!」
「Bingo!其實有專業實驗室曾經做過實驗,用激光多普勒振動計 (Laser Doppler Vibrometer) 去測量唔同西瓜嘅振動頻率同成熟度有咩關係,發現生啲嘅西瓜振動頻率會高啲,聽落清脆;而熟啲嘅瓜振動頻率會偏低,聽落啞沉。」
「有網民問點解西瓜成熟嘅過程同振動頻率有關喎?」發哥不忘照顧一下睇緊直播嘅粉絲,順勢俾發嫂威返次。
「哦!咁係因為西瓜成熟嘅過程會開始脫水同分解細胞壁入面嘅纖維素,脫水會令果肉汁液嘅糖分結晶,所以成熟啲嘅瓜自然就甜啲啦!而細胞壁降解就會令細胞鬆散,形成起沙嘅感覺,改變咗果肉組織嘅彈性同影響共振頻率。」
「其實仲有其他水果,例如:蘋果同奇異果咁都會因為成熟而降低振動頻率,不過西瓜瓜皮比較硬,我地難啲從表面去判斷佢熟透未啫。」
「哇!發嫂真係好專業呀。」發哥見發嫂解釋得有板有眼,都覺得好匪夷所思,諗住自己都試下拍西瓜。
「點解我聽唔出有分別嘅?你係咪整蠱我架?」
「你隻耳又點同人地實驗室用嘅專業儀器比呀?其實用聽嘅方法有好大誤差架,因為振動頻率相差唔大,要有一定經驗先分得出,所以今次你要輸俾師奶啦!」
「吓!咁如果我…啲粉絲想幫手揀西瓜仲有無其他方法呀?」
「都唔係話無嘅!外國有組織 (The National Watermelon Promotion Board) 都提供左啲方法俾大家,你可以叫網民去下面個網址睇下架!」
http://www.watermelon.org/Faqs
「哦,原來係咁!好喇,今日直播嘅時間又差唔多喇,下次再見啦!」


參考資料:
https://www.researchgate.net/publication/275295909_Nondestructive_determination_of_
watermelon_flesh_firmness_by_frequency_response

https://www.ncbi.nlm.nih.gov/pmc/articles/PMC4325046/pdf/13197_2013_Article_1068.pdf

31 / 08 / 2017

夏日炎炎,陽光普照的一天,志明興奮地大叫起來:「落咗咁多日雨,終於都好天喇!係時候到我依個陽光大男孩出去同陽光玩遊戲,吸收一下正能量喇!」 「咁激動做乜啫?練唔到倒三角,想晒黑啲扮有陽光氣息呀?咁都只會係由豬腩肉變脆皮燒豬咋喎!」春嬌取笑道。

「我會搽太陽油架嘛!嗯…不過你屋企有冇呀?一齊去曬下啦!」
怕曬黑的春嬌拒絕:「冇喎,唔去呀,咁曬!」
志明周圍望,發現有一支防曬面霜:「依支咪幾好囉,SPF50喎!」
「你傻架?用我嗰支咁貴嘅面霜嚟搽你啲豬腩肉,諗都唔好諗呀!」春嬌立即阻止:「不過話時話,SPF實際係咩嚟?」
「哦~SPF即係Sun Protection Factor,或者叫做防曬系數,表示可以幫你擋住幾多UVB…」
春嬌插咀:「依個我知係咩嚟呀,紫外線可以根據佢嘅波長分為較長嘅UVA同較短嘅UVB。主要令人晒黑嘅其實係UVA,吸收得多就會令人出皺紋同黑斑;而UVB就會晒到人嘅皮膚又紅又腫,仲會甩皮添!我依支防晒面霜係可以擋晒UVA同UVB架,咁先唔會晒到出皺紋嘛!」
「你果然對啲美白嘢好熟喎,不過又會唔知咩係SPF嘅?」
「我只係知道個數字越高越好咋!」
志明解釋道:「其實防曬系數係咁解嘅,如果係SPF15嘅話,就係俾15份之1嘅UVB穿過,到達你嘅皮膚,而SPF50呢,就係50份之1喇!所以SPF50防曬力會高啲!」

「原來係咁,不過計返條數,即係SPF15可以擋到93%嘅UVB,而SPF50就係98%,都唔係差好遠啫!」
「叻豬喎,計得咁快嘅!睇落就好似唔係差好遠,不過對一啲對紫外光好敏感嘅人嚟講,依幾個percent嘅分別都可以影響好大架喇!不過亦都有人會講,如果冇搽防曬之下,皮膚會喺10分鐘之內被曬傷;而SPF15嘅防曬用品,就係可以延長依個時間15倍,啫係150分鐘喇!」
「嘩!咁我依支咪即係可以延長到500分鐘囉,成8個幾鐘喎?!」
志明用手指篤著春嬌的面頰說:「傻嘅~你點會知道個太陽有幾猛喎?仲有,每個人嘅體質都唔同,你啲皮膚咁白雪雪,可能晒1分鐘就會曬傷呢!所以依個都只係參考嘅數字。如果一個人出汗出得多,或者游一轉水,都會好易整甩啲防曬架!所以就好似你成日走去補妝咁,時不時都要補搽返先得架!」

春嬌扁咀道:「你依加係咪話我成日掛住化妝呀?你呀,又要人靚,又要人素顏,想點啫?」
對於突如其來的話題轉變,志明怯了一怯:「唏~傻婆嚟嘅,你化唔化妝、曬黑定曬白都係咁靚架啦!」
春嬌一面偷笑一面說:「曬白…都唔知你講乜!?咁你自己仲出唔出去曬呀?。」
「唔出去曬lu~」志明抱著春嬌,很老土地說:「You are my Sunshine嘛!成個太陽都喺到嚕,仲使乜出去啫!」



參考資料:
http://www.medicalnewstoday.com/articles/306838.php
http://www.skincancer.org/prevention/sun-protection/sunscreen/sunscreens-explained https://en.wikipedia.org/wiki/Sunscreen

26 / 08 / 2017

究竟咩先係最好聽嘅聲音呢?通常我地唔會去評價一粒音好唔好聽,反而我地會比較兩粒唔同嘅音聽落夾定唔夾,即係所謂嘅和唔和諧喇。

喺好耐好耐以前,畢達哥拉斯,即係提出畢氏定理嘅希臘數學家,相傳佢用個得一條弦嘅琴去測試下唔同長度嘅弦彈出嚟嘅聲樂夾唔夾。用手按住弦不同嘅位置,愈短嘅弦線會彈出愈高嘅音。佢發現原來某啲特定長度比例嘅弦線彈出嘅音係夾啲,而呢個比例係一啲整數嘅比例,例如 1/2 同 2/3。我地可以當一條30cm長嘅弦線彈出嚟嘅聲音係Do,當長度短左一半即係15cm時,彈出黎嘅聲音就係高音Do,聽落同原本個音好夾同埋好相似,即係我地宜家講嘅高八度(Octave)。而20cm嘅弦,即係比例係 3/2 時,彈出黎嘅Sol 音,都係聽落好夾嘅,佢地嘅差距稱為「完全五度」(Perfect fifth),而以 1、8/9、4/5、3/4、2/3、3/5、8/15、1/2 嘅弦長度比例,就可以做出我地熟悉嘅七聲音階 (即Do Re MiFa Sol La Ti Do),呢種按整數比例數列推演出來嘅音階稱為「純律」 (Just intonation)。

以上嘅長度比例同樣適用於其他樂器,例如管樂嘅管孔位置、鋼片琴嘅鋼片長度等。因為聲音係由樂器振動產生,而產生嘅音高係同振動元件嘅長度有關,所以按以上長度比例就可以做出樂器嘅音階。但以上所講嘅純律只係其中一種定律嘅方法。由於此定律涉及一啲與數學及音樂有關嘅問題,所以古時嘅人都好努力地研究如何計算出合適嘅定律方法。下回我地就會再同大家介紹一下現今鋼琴同吉他都使用緊嘅「十二平均律」。

睇到呢度係咪好心癢呢?等我用以上「純律」嘅數列,教大家點樣將唔同嘅物件變成樂器啦!以下將會以飲管作為示範 (可參考下圖),明白左個原理之後,理論上你用咩黎整都得架!首先揾一條飲管度下佢幾長,以我呢支為例係22cm長嘅,咁你輕輕係上面一吹記住呢個就係Do 音啦。當你吹嘅時候,空氣振動嘅範圍係全長22cm嘅整條管,所吹出黎嘅聲音就係最低音。當我地開始喺飲管上打窿時,如果你唔按住個窿,空氣就會喺個窿到流走。由於振動嘅範圍短左,因此會產生較高嘅音。宜家我地打第一個Re窿,Re窿應該要將管縮短 8/9,所以打窿嘅位置應該係距離吹氣口大約19.6 cm (即是 8/9 x 22 cm)嘅位置。而Mi 窿嘅位置就係17.6 cm (即是 4/5 x 22cm),如此類推。大家可以按「純律」數列計算出其他打窿嘅位置。記住當想吹Re 音時,你要用手指按住所有Re 窿以上嘅窿,咁先可以令到振動範圍有 8/9 咁長。學左以上嘅計算方法,大家就可以發揮創意整好多獨一無二嘅樂器啦!





如果你想快啲睇到下篇文章,就要快啲回覆一張你自製樂器嘅相畀我地睇啦!

延伸閱讀:
http://hyperphysics.phy-astr.gsu.edu/hbase/Music/just.html
https://faraday.physics.utoronto.ca/PVB/Harrison/Flash/Temperament/Temperament.html

18 / 08 / 2017

朝偉有天突然心血來潮想到郊外行山,感受一下新鮮的空氣,於是便去請教行山界KOL發哥。
「我要行山,要去全香港最有特色嘅山嶺!發哥,我唔怕辛苦架,最緊要景色夠靚夠壯觀!」
發哥反問朝偉:「呢個問題一年裡頭都唔知有幾多人問過啦,其實每個山嶺景色都好靚,你想睇啲咩風景先?」
朝偉:「一係唔睇,一睇就要睇最壯觀嘅景色,好似美國大峽谷咁樣就最好啦!不過香港又點會有咁嘅景點吖⋯」
發哥聽到大峽谷便立刻精神起來:「乜你唔知香港都有一個大峽谷咩?佢位於屯門青山西面,又名青山腹地,係香港其中一處最大嘅劣地(badlands),地形複雜,仲有好多景點,幾符合你要求架!」
朝偉有一點疑惑:「劣地?即係笪地俾人搞到個環境好差?我唔要人為整出嚟嘅地方,我要全自然!」
看來發哥要給朝偉一個詳細解釋:「劣地並唔係指一啲俾人過度開發嘅地呀,而係泛指一啲土層被雨水侵蝕,形成好多沖溝或深坑、寸草不生嘅地方,主要係由風化作用及化學反應等多種因素所形成。天氣乾旱時,地表因沒有水份而裂開;當雨季來臨時,雨水流入呢啲裂縫,水會沖刷裂縫旁邊嘅地表而進一步擴大裂縫面積。經過多年嘅沖刷,呢啲裂縫最後形成一個個大小不一嘅峽谷深溝。」
朝偉一邊聽發哥的解釋,一邊上網搜尋青山腹地的相片,已經深深被那獨特的景色所吸引。他對那些沒有草披的光禿禿地表大感疑惑:「咁多雨水唔係應該好適合植物生長架咩?點解而家一棵草都無嘅?」
發哥繼續解釋:「青山腹地嘅岩石群主要係花崗岩(Granite)。相比火山岩(Volcanic rock),花崗岩較容易受風化作用所影響。長年累月嘅風化作用除咗令表土嘅水份容易流失之外,花崗岩中有一少部分嘅石英(Quartz)會溶於水並產生矽酸(Silicic acid),令表面嘅土層變酸,變成一片不利植物生長、寸草不生嘅環境…咦,朝偉你去邊呀?」
「我而家就想行!快啲帶我去啦!」
發哥無奈的說:「算啦偉仔,你都係上網用眼睛去行山啦。」

*青山除青山寺至山頂一段外,大部分地區均為操炮區,市民切勿前往。

青山劣地

資料來源:
陳龍生(2016)。香港地質瑰寶GEOLOGICAL HERITAGE OF HONG KONG。雅集出版社有限公司
http://ihouse.hkedcity.net/~hm1203/lithosphere/denu-gully.htm
https://geomika.com/blog/2013/08/17/weathering-igneous/
http://hkss.cedd.gov.hk/hkss/eng/education/GS/tc/hkg/chapter4.htm
https://en.wikipedia.org/wiki/Badlands

29 / 07 / 2017

「十萬伏特!!!」

比卡超使出佢嘅絕招十萬伏特,連喺佢隔離嘅美國隊長都差啲比佢電到,但係同樣企喺比卡超隔離嘅鋼鐵俠就咩事都無。大家都係超級英雄,到底點解會咁嘅呢?

原來關鍵就在於佢身上套衫!

鋼鐵俠之所以能夠承受比卡超嘅十萬伏特電力,全因為佢身上嗰套用金屬造嘅盔甲應用咗法拉第籠(Faraday cage)嘅原理。法拉第籠係一個用導電物料體造嘅籠,由於電荷與電荷之間有很強的排斥力,因此電荷只會在籠的表面流動,無論籠外有幾多隻比卡超向住個籠使出十萬伏特,電流都只會喺籠外流過,而唔會流向籠內,所以籠內嘅人唔會有任何損傷。


(按圖放大)

但要注意,雖然法拉第籠嘅外型好似鳥籠,但係就必須放喺地上而唔可以拎喺手,咁先至能夠將個籠接地,讓電流向地,以地作為電嘅終點。

現實世界當然唔會有小精靈用十萬伏特電力攻擊敵人,但臨近夏季嘅雷雨天氣,頻密嘅雷電現象亦會對人類嘅生命構成威脅。不過,只要你好似鋼鐵俠咁,有一套盔甲保護你,即使喺四野無人嘅空地被閃電擊中,都唔一定會有生命危險。又或者留喺車入面,都一樣無事架,因為車嘅設計,其實亦係一個法拉第籠,車嘅金屬外殼能夠令電只係喺籠外流向地,從而可以保護車入面嘅人。

注意:高電壓會對人造成生命危險,所以即使有鋼鐵盔甲都唔好立亂嘗試接觸高電壓。



資料來源:
https://en.wikipedia.org/wiki/Faraday_cage
http://chiuphysics.cgu.edu.tw/yun-ju/cguweb/sciknow/phystory/Faraday/FaradayCage/FaradayCage.htm

1 2 3 4 5  Next 

Contact Us

Address : Room 211, 2/F, Lakeside Two, East Wing Phase Two, Hong Kong Science Park Pak Shek Kok, New Territories

Tel : 2561 6149
Fax : 2565 8345
Email : ccst@hkfyg.org.hk

Directions

Science Courses Enrollment