Science and Technology


24 / 06 / 2017

在一個晴朗的星期天,廣志計劃帶美冴及小新到郊外遊玩,吸收一下新鮮空氣。
「去郊外好呀!我要BBQ!燒雞翼我鍾意食!要有咁多蜜糖得咁多蜜糖吖唔該!」小新跟媽媽嚷著說。
美冴無奈的說:「邊有人咁熱都去燒嘢食㗎?其實咁熱,最好應該去行下商場,食杯雪糕。」
廣志沒有理會美冴:「小新呀,琴日先至食完烤豬扒,食得太多燒烤食物對身體無益㗎,分分鐘會吸收太多致癌物引致大問題呀!」
美冴一聽到致癌即時非常警覺:「吓!我以為食得多肉類最多都只係會肥添!點解會致癌架?」
廣志知道是時候可以展示自己豐富的科學知識!「是咁的,大部分食物都係由有機化合物所組成。當呢啲有機化合物喺高溫下加熱,就有機會變成其他物質喇,當中最危險嘅物質就係一種叫多環芳香羥(Polycyclic Aromatic Hydrocarbons),簡稱 PAHs 嘅化合物。PAHs 含有兩個或以上嘅苯環(Benzene Ring),係碳氫化合物,喺煤、石油中都可以搵到,不過喺燒烤肉類入面所搵到嘅 PAHs 都係燃燒過程當中製造出嚟嘅。」
「咁同致癌有咩關係?」美冴仍然對致癌非常敏感。
廣志見美冴非常用心聆聽,更詳盡地解釋:「歐美多個權威組織,包括世界衛生組織嘅研究,都指出部份PAHs有機會引致癌症,當人食咗呢啲含有PAHs嘅食品之後,呢啲物質就會轉化成活性代謝物(Active Metabolites),有機會同DNA結合,引致癌變。」
美冴非常驚訝:「咁以後都唔可以食燒烤食品喇!」
廣志:「咁又唔駛完全唔食,按香港食物安全中心建議,只要唔好進食過量,避免食燶咗嘅食物,同埋燒烤前,先切咗肉上面見到嘅脂肪,都可以減低食物表面上 PAHs 嘅含量。」
小新這時突然插嘴:「吓!咁危險!我都係唔BBQ喇!都係食叉燒飯啦!」
廣志和美冴異口同聲道:「咁有咩分別?」

燒味究竟是否含有 PAHs?大家可以到以下網址,比較各種燒味的 PAHs 含量:
http://www.cfs.gov.hk/tc_chi/programme/programme_rafs/programme_rafs_fc_01_06_05.html


資料來源:
https://en.wikipedia.org/wiki/Polycyclic_aromatic_hydrocarbon
https://www.atsdr.cdc.gov/csem/csem.asp?csem=13&po=11
http://www.cfs.gov.hk/tc_chi/programme/programme_rafs/programme_rafs_fc_02_09.html

16 / 06 / 2017

之前有一款手機遊戲推出,旋即掀起熱潮,大家都瘋狂咁捉精靈。你又有無諗過喺現實生活裡面都養返隻精靈呢?

不過可能你會話人哋啲精靈又得意又有唔同特性,連龍都有得養,點比呢?而家就為大家介紹一隻同啲精靈有得「揮」嘅寵物!


https://www.youtube.com/watch?v=PRNVi-8TWx0

https://www.youtube.com/watch?v=3xaNsaKN6hs

佢就係俗稱「六角恐龍」嘅寵物喇,係咪好得意呢?佢望落有啲似娃娃魚,但全身上下都冇鱗片,更古怪嘅係佢身上面有四隻小短腿,頭上有六隻角,身後仲拖住一條大尾巴,而且會發出「嗚帕魯帕」嘅奇特叫聲。其實佢嘅正名應該叫「墨西哥鈍口螈」(學名:Ambystoma mexicanum),係墨西哥嘅特有品種,屬於兩棲類動物。佢嘅頭部兩側分別有三根鰓,望落去好似有六隻角咁,所以就俾人叫佢做「六角恐龍」囉。

六角恐龍有好多特別之處,其中一個特點就係所有女人都好想要嘅不老容顏喇(其實男人都想要)!一般兩棲類動物都會經過變態(metamorphosis),由幼態發育到性成熟形態,例如蝌蚪會變態成為青蛙,幼體嘅時候會用鰓呼吸,然而鰓會喺成長過程中逐漸消失,最後發展成用肺部呼吸。但係六角恐龍即使成熟後仍然保持水棲幼體形態,繼續以鰓呼吸,仲可以keep到個得意樣。佢仲有獨特嘅復原能力,受傷嘅時候亦都唔會留有任何傷痕,甚至可以重新生出重要嘅器官(例如肢體、腦部),所以好多科學家都着手研究佢架!

講咗咁耐,點先養得到六角恐龍先?佢雖然係瀕臨絕種動物,但可以人工大量繁殖,所以坊間唔難搵到,價錢亦都唔算貴。不過要養佢就有好多嘢需要注意喇!首先佢係兩棲動物,需要幫佢準備一個水溫保持喺攝氏二十四度以下嘅水缸。同時佢係肉食性動物,主要以昆蟲或者小魚等有腥味嘅動物為食糧,而且進食頻繁,餵食後殘餘食物好容易會令水質變差,所以需要一個效能較好嘅過濾器,否則水質變差好易令六角恐龍病架。佢亦都唔可以同其他水中生物混養,因為其他水中生物好易會當咗佢啲鰓係食物。

無論點都好,養任何寵物都絕對唔係草率嘅事,養之前記住要諗清楚啊!

資料來源:
https://zh.wikipedia.org/zh-hk/%E5%A2%A8%E8%A5%BF%E5%93%A5%E9%92%9D%E5%8F%A3%E8%9E%88 https://kknews.cc/zh-hk/science/qp8z2r.html

09 / 06 / 2017

「本產品螢幕用上藍寶石玻璃…」

為何電子產品的螢幕要用上藍寶石呢?

藍寶石水晶玻璃(Sapphire Glass) 可以說是近年材料科學界的新寵兒,它被冠以「藍寶石」這個名字不是代表它是藍色的寶石,而是在化學角度上它跟天然藍寶石的成分一樣,都是由氧化鋁(Aluminum Oxide, Al2O3) 晶體所組成。氧化鋁在於自然裡界結晶化時,由於它包含了一些其他物質,因此形成了不同顏色,如天然藍寶石的藍色就是因為晶體中含有少量的鈦(Titanium) 及鐵(Iron)。人工合成的藍寶石晶體是將純氧化鋁原料在高溫下結晶化而製成,由於沒有混入其他雜質,因此人工合成藍寶石晶體大多是透明的,可以讓紅外線至紫外線的波長穿透,適合用於不同電子產品的螢幕上。

藍寶石水晶玻璃除了因為它是透明而適合用於電子產品的螢幕外,更重要是因爲它是世界上數一數二堅硬的物料。礦石界中的硬度標準一般會使用由德國礦物學家腓特烈.摩斯(Friedrich Mohs) 所創立的摩氏硬度(Mohs Scale)。根據摩氏硬度標準,世界上最硬的天然礦石為鑽石;藍寶石及紅寶石等稱之為剛玉(Corundum) 則為第二硬的礦石。在衡量硬度與製造成本後,藍寶石水晶玻璃成為電子產品螢幕的最佳物料,日常生活中使用的物品都難以對它損毀分毫。

縱然氧化鋁並不是一種十分昂貴的物料,人工藍寶石玻璃的成本最主要是來自製作上的問題,因為它是世界上第二堅硬的礦石,當需要切割成不同形狀時就要用比它更堅硬的東西去切割,而且它非常容易脆裂,所以不論是所使用的工具以及在製作過程中都有大量原材料因脆裂而被消耗,都引致人工藍寶石玻璃的價格仍然較為昂貴,不是人人都覺得有需要。

您身上的電子裝置又有多少地方已經用上藍寶石水晶玻璃?


資料來源:
https://en.wikipedia.org/wiki/Sapphire https://en.wikipedia.org/wiki/Mohs_scale_of_mineral_hardness http://www.businessinsider.com/how-sapphire-glass-screens-are-made-2014- 9

03 / 06 / 2017

大清早,媽媽如常為心美準備早餐和午飯盒。

心美:「媽媽早晨…」

媽媽轉頭看見心美如喪屍般嘅容貌嚇一跳:「嘩!你個黑眼圈同熊貓差唔多大,琴晚幾點瞓呀?」

心美:「今日要present,所以搵資料搵夜咗囉‧‧‧‧‧‧」

媽媽:「真係搵資料定同人WhatsApp 呀?」

正在喝橙汁的心美差點被嗆到:「咳‧‧‧咳‧‧‧真喺搵資料呀媽媽,唔好咁多疑啦!」

「家姐都唔肯瞓覺嘅,佢電話咁光搞到我都瞓唔到。」妹妹忍不住控訴。

「Sh……你又話唔會同媽媽講嘅,你唔洗旨意我買隻熊仔俾你呀!」感到被妹妹出賣,決定懲罰她。

媽媽:「你兩個唔洗再細細聲講啦,兩個都夜瞓,兩個都唔啱!成日都同你哋講睡眠時間同質素都好重要架嘛,瞓覺前唔好用電話又唔聽!」

妹妹:「瞓覺之前唔用電話真喺會好瞓D咩?」

「喺正常嘅情況下,大腦嘅松果體會隨住環境變得陰暗而開始釋放褪黑激素(Melatonin)。呢種夜間賀爾蒙會減低人嘅警覺性,幫手培養睡意令我哋易D瞓著。」媽媽繼續說:「但係手機螢幕發出嘅光會刺激眼睛,視網膜上面嘅感光細胞偵察到依啲光,就會send message 俾大腦。松果體收到呢個訊息會以為我哋想繼續做野,就會停止釋放褪黑激素啦。」

心美:「咁即係話只要感光細胞偵察到有光都會令松果體製造少D褪黑激素?咁同我地平時唔記得熄燈瞓覺係咪差唔多呀?」

媽媽:「其實我地嘅感光細胞對於電腦或者電話D螢幕所發出嘅短波長藍光特別敏感,如果我哋瞓覺前兩個鐘接觸到呢種光線,就會更加降低褪黑激素嘅濃度,令我哋更加難瞓著喇。」

心美:「唔緊要啦!我咁青春,適應力會強啲!一熄個mon就會好快製造返啲褪黑激素架喇!」

媽媽:「唔係囉,藍光對你哋後生仔影響仲大呀!比起大人,你地只要受到少量藍光嘅刺激就會抑制更多褪黑激素。」

妹妹:「唔怪得家姐朝朝都咁嘅樣啦,每晚都唔夠瞓,點化妝都無用啦!」

如果你都想瞓一覺好嘅,第二朝有個靚樣見人,由今晚開始瞓覺之前就唔好再玩手機喇!


資料來源:
https://technews.tw/2014/09/03/blue-light-affect-sleep-quality/ http://www.howitworks.com.tw/index.php/content-views/186-the-science-of-insomnia

26 / 05 / 2017

大雄同靜香正在討論去邊度旅行嚟慶祝結婚10周年。

大雄:不如我地去沙巴潛水,曬下太陽丫!

靜香:唔好啦!曬得多好傷皮膚架!

大雄:咁不如去新西蘭玩笨豬跳丫!

靜香:跳乜鬼丫!你咁細膽,未跳落去都已經嚇死咗啦!

大雄:Er…咁又係... 咁去日本睇櫻花呢?

靜香:都5月喇喎,通常見其他人都係3、4月去睇,櫻花花期又得一個星期左右,呢個時間仲邊有得睇呀?

大雄:櫻花開花唔係視乎月份嘅,而係視乎溫度架嘛!東京、大阪呢D比較南面嘅地方就係3、4月開花,但係日本北面氣溫比較遲先至回暖,所以例如北海道咁,有機會去到6月都仲有櫻花睇架!

靜香:原來係咁!我淨係知道櫻花有好多種,有D係白色,有D係粉紅色,仲有種叫秋櫻,佢係秋天先開嘅櫻花丫嘛!

大雄:一半正確啦!秋櫻其實唔係櫻花黎架,秋櫻正式係叫大波斯菊,完全係另一個品種嚟,而佢地喺演化過程嘅關係都比較遠。

靜香:哦!咁我地不如走去睇夜櫻丫!聽個名應該係夜晚先開,好浪漫呀!

大雄:睇你點睇啦,夜櫻只係正正常常一棵櫻花樹啫,夜晚D人開燈照住佢,咪夜櫻囉!不過其實呢個係日本人賞花嘅習俗,通常佢地會喺開滿花嘅櫻花樹下飲野食野,好開心架!

靜香:飲飲食食就最啱我喇,係咪有得食櫻花架?我未食過櫻花呀!

大雄:我都未食過櫻花,不過櫻花樹嘅果實就食過,你都肯定食過啦!

靜香:未喎,咪住先,櫻花樹邊有果實架?見親都淨係得花咋喎!

大雄:無錯!大部分觀賞用嘅櫻花樹的確係唔會結果實,但係其實好多品種嘅植物都可以分類為櫻花樹,其中少部分俾人類經過栽培後就會結果實,果D又大粒又甜嘅車厘子咪係櫻花樹嘅果實囉!

靜香:唔怪得車厘子又叫做櫻桃啦!Cherry blossom (櫻花) 原來係會結出 Cherry (車厘子)!

大雄:係呀!D車ly…

靜香:係Cherry呀…

大雄:英文差丫嘛... D Cher厘子其實仲係布冧、桃同杏嘅近親添!所以佢地都好似樣架!

靜香:係喎,佢地全部都係得一粒硬嘅核,核外面係又甜又多汁嘅果肉!話時話,點解大雄你聰明左咁多嘅?

大雄:哈哈哈!因為... 頭先我用左「如果電話亭」,我話:「如果靜香同我嘅智商交換」,所以我就咁醒啦!

靜香:唔怪得我蠢左咁多啦,好衰架大雄!


資料來源:
https://en.wikipedia.org/wiki/Cherry_blossom

19 / 05 / 2017

小新今日看到網上瘋傳嘅貓與青瓜影片 (https://www.youtube.com/watch?v=cNycdfFEgBc),其中剪輯咗多段貓喺進食時被青瓜嚇到跳起來嘅樣子,忍不住和媽媽分享:「你睇下,原來貓係好驚青瓜架!點解嘅?點解嘅?」
美亞媽媽睇完影片,諗咗一陣就同小新講:「等等先,你仲記唔記得喺學校學過嘅科學方法有咩步驟呀?」
小新真係估唔到,原本只係諗住睇下片輕鬆下,點知又畀人考返轉頭:「哎呀,咪就係觀察、提出問題、假設、實驗、分析同結論囉!」
美亞突然古人上身,念念有詞道:「古語有云:『學則須疑』。無理由人講你就信架!同埋你都想知點解架嘛,不如你就當條影片係你嘅觀察,如果你嘅假設係『貓只會或特別懼怕青瓜』,你會點設計你嘅實驗去驗證你嘅假設呢?」
「不過咁喎,做科學實驗都要合乎道德,唔應該令動物承受不必要嘅痛苦。由於呢個實驗可能會對貓做成心理壓力,所以我哋都係純粹討論一下,做個空想實驗啦。」美亞補充說。
小新對呢個空想科學實驗都有啲興趣,決定重新細心觀察條影片,同埋上網做下資料搜集。「我留意到每次啲貓嚇親都係喺佢低頭食嘢時,再加上啲青瓜都係出其不意咁出現。其實恐懼同出其不意嘅驚嚇係好唔同嘅反應,我諗可以首先實驗下究竟貓係懼怕青瓜定係被出其不意嘅青瓜嚇親。另外,仲有人話可能係因為青瓜似蛇,貓因為本能反應所以先急速逃走。」小新一路做出神探伽利略嘅手勢一路說。
美亞說:「係啦,你諗下如果我半夜喺你瞓到朦朦朧朧時遞個青瓜畀你,你都有可能會嚇到彈起啦!不如你將幾個你覺得實驗入面可以改變嘅變數寫出嚟,再寫埋你預測嘅結果。」
「好啦我寫啦,你千祈唔好失驚無神遞個青瓜畀我,我諗我都會驚囉。所以將心比己,我係唔會揾貓嚟做呢個實驗架囉!」小新真係有啲驚美亞會突然嚇佢。


美亞睇完小新寫嘅圖表,睇到小新識得公平測試(即係每次實驗只改一個變數),都令美亞幾滿意。美亞又再問:「咁如果做完實驗設計2同4之後,你發現貓係唔會被慢慢出現嘅青瓜嚇親,即係同你預測嘅結果唔同,咁你會點做呢?」
「咁可能我就要將假設改為『貓係會被出其不意出現嘅東西嚇親』,不過呢個假設好似無咩科學價值,所以我會用玩具蛇實驗一下究竟係唔係因為青瓜似蛇,以致貓會被嚇親。」
「算你啦,你都幾明白整個科學方法嘅的概念。其實原來已經一早有人用20隻貓再做返原本嘅實驗 (https://www.youtube.com/watch?v=t0MiFUJXO1E),但係啲貓完全無被青瓜嚇親。所以可能只係好少部分嘅貓先會出現呢個現象。」
「咁可能要將研究方向改為『咩品種嘅貓係會被青瓜嚇親』,不過無理由為咗滿足人類嘅好奇心要啲貓受潛在嘅痛苦,小白就唔同喇,佢好捱得苦架!等我揾佢幫下手先!」
「……」

資料來源:
http://news.nationalgeographic.com/2015/11/151117-cats-cucumbers-videos-behavior/

相片來源:
https://i.ytimg.com/vi/cNycdfFEgBc/maxresdefault.jpg

12 / 05 / 2017


平日大家常見的樹葉均是綠色的,但你是否知道每年入秋後,它們會由綠色變成黃色或紅色呢?

如果想知道為何樹葉會變色,首先我們必須要了解樹葉本身是綠色的原因。

樹葉中存在著一種名為葉綠素 (chlorophyll) 的色素,它會吸收陽光中的紅光和藍光,並反射綠光,所以是綠色的。透過光合作用,葉綠素會利用陽光所獲得的能量,把二氧化碳和水轉換碳水化合物及氧氣。樹葉中還有一種黃色的葉黃素 (Lutein),它會協助吸收藍光,從而增加光合作用的效率。在正常情況下,葉綠素是葉黃素數量的8倍,所以樹葉一般都是綠色的。

黃葉
到了秋天,樹木會感受到日短夜長及溫度開始下降。當去到一定的變化時,它們就知道需要「節省開支」準備過冬,並停止對樹葉提供養分。因此葉綠素會漸漸被分解,使原本在樹葉內分解速度較慢的葉黃素較易顯現出來,令樹葉變成黃色;如果葉黃素的濃度高時,樹葉更會呈現為橙色。

紅葉
紅葉的紅色主要來自花青素 (anthocyanin),不過它不像葉綠素和葉黃素一樣一直存在樹葉內,而是當樹木遇到較惡劣的環境時,例如:太猛烈的陽光、寒冷或缺水等等,才會慢慢被製造和積聚起來。花青素其中一個功能就好像「防曬劑」般能保護葉綠素,減慢葉綠素被猛烈陽光分解的速度,從而保持光合作用的效率。

考考你:
其實還有褐色樹葉,它是如何形成?

資料來源:
https://www.imynest.com/content/188247.htmll
https://kknews.cc/news/rekroon.html
https://www.ncbi.nlm.nih.gov/pmc/articles/PMC3121999/
https://baynature.org/article/photosynthesis-in-leaves-that-arent-green/
https://en.wikipedia.org/wiki/Anthocyanin
https://researchspace.auckland.ac.nz/handle/2292/497

31 / 03 / 2017

雨天,貝多芬鬱鬱不樂的,決定到他上星期發現的秘密花園散心。那裏收藏了一部古式三角鋼琴,正合他心意。
及至,貝多芬俯身打開琴蓋,輕撫琴鍵,閉上眼睛,仿佛就能聽到他最後創作的《第九交響樂曲》。他慢慢坐下來,雙手開始在琴鍵上飛舞。正當貝多芬彈得興高采烈之時,背後有人正慢慢靠近。

(以下對話將由德語翻譯成中文)
「你不覺得這部鋼琴的琴音怪怪的嗎?」背後那人說。
貝多芬不答話,仍然陶醉在自己的音樂中。他的態度令那人有點不耐煩,於是伸手搭了貝多芬的肩膀,示意他不要再彈了。
「呀!是莫札特!真不敢想像我能在這裏遇上你。」貝多芬轉身看到自己的偶像莫札特,激動地抓著莫札特雙臂大聲說。
強大的聲波差點把莫札特最引以為傲的耳膜震破。莫札特輕撥貝多芬並抓著他的雙手,道:「你聽不出這部鋼琴的琴音不夠清脆嗎?」
貝多芬看著他的口型,誤以為他批評自己的作品,生氣地說:「才不是!我覺得很動聽呀!」遂自顧自地繼續彈奏他的樂章。
莫札特覺得貝多芬的回答莫名其妙,於是他走近,抓着他的左手按下中音C,然後把耳朵貼着鋼琴細聽。貝多芬被這舉動嚇了一跳,但還是跟着他把耳朵湊近。
憑着鋼琴微妙的振盪,貝多芬終於「聽」出這中音C抖抖的,音量忽大忽小,難道這部鋼琴走音了?

要知道鋼琴是否音不準,首先要了解鋼琴的結構。有別於一般弦樂器,鋼琴的琴音是由擊弦音棰同時間敲打三條弦線所產生。當三條聲波在空氣互相影響,便會產生相加干涉現象(Constructive Interference)或抵消干涉現象(Destructive Interference)。


聲波是通過粒子振動以傳遞能量。它的音量和音高分別取決於它的振幅(Amplitude)及頻率(Frequency)。鋼琴的琴音之所以較其他弦樂雄亮,是利用了聲波的相加干涉現象。三條相同頻率的弦線同一時間被擊中,它們合起來所發出的聲波振幅大了三倍,音量也隨着增加三倍。

相加干涉現象(Constructive Interference)


抵消干涉現象(Destructive Interference)

但當長時間沒有為鋼琴調音,不同因素,如:濕度或溫度變化、移動鋼琴等,都會令弦線拉力有所改變。當擊弦音棰再次同時間敲打三條弦線時,因為弦線拉力不同令產生出來的三條聲波於頻率上有些微差異,導致有拍頻(Beat)這個聲效出現。

拍頻所指的是音量改變,一般發生在樂器調音時。當兩條頻率極相近但不相同的聲波互相干涉,聲量會因為相加干涉現象及抵消干涉現象而增強和減弱。每個聲量改變排列就是一個拍頻。若果兩條聲波頻率相差10Hz,它們合起來的聲音每秒鐘就會有10個拍頻,就是說每秒鐘琴音會抖動10次。而鋼琴調音師就是憑拍頻斷定琴音的準確度。

以下是104Hz 聲波和110Hz 聲波合起來的聲音,你們聽到每秒鐘有多少個拍頻嗎?(首兩秒是110Hz,接着兩秒是104Hz,最後兩秒是合音)
https://upload.wikimedia.org/wikipedia/commons/2/2c/Beat_-_superposition_of_104hz_and_110hz_sine_waves.ogg

如果你的答案是最後兩秒有12個拍頻就對了!(每秒鐘抖動6次)

我們的聽力范圍一般是由20Hz 至20,000Hz。當頻率愈高,聽力的敏感度會隨著下降。所以琴音愈高,頻率差距愈少,就愈難聽出拍頻了!想挑戰一下自己的耳朵,以下就有一段440Hz 聲波和445Hz 聲波合起來的聲音。
https://soundcloud.com/pansci/wiwi-digital-music-technology440-445

看着莫札特把鋼琴的琴音都調至零拍頻,貝多芬流露出羨慕的眼神。莫札特也技癢即席表演了他的《小星星變奏曲》。他非常滿意自己調的琴色。
此時,魯本(Rubén González)從遠處走來,生氣地說:「是誰碰了我的鋼琴?那些抖抖的音都沒有了!」
註:Rubén González(1919-2003) 是近代的鋼琴家,他的音樂糅合了爵士及古巴本土特色。

其實音準這回事,在不同時代都有不同定義。在古典音樂裏,琴音愈清脆響亮愈完美。但在爵士音樂的世界,那些抖抖的音更能表達出情感。所以,走音與否,還是要看表演者想表達甚麼了!

資料來源:
http://www.scienceclarified.com/everyday/Real-Life-Physics-Vol-2/Interference-Real-life-applications.html
https://en.wikipedia.org/wiki/Beat_(acoustics)

相片來源:
http://www.pianos-afinador.com/?page_id=4158&lang=en

24 / 03 / 2017

熱衷科學的小明終於完成了學校的學期測驗,於是便嚷著要去看與數學及航空有關、近期熱爆的電影 — NASA無名英雌。媽媽心想:既然測驗已經完畢,亦都是時候讓兒子輕鬆一下,便一口答應,還即時在網上訂了門票。

兩日之後,小明終於可以去看他期待已久的電影了。去到戲院的小食部前,小明就被眼前的爆谷吸引。


小明:睇戲冇嘢食,硬係差咁D嘢嘅。不如我地買包爆谷入去邊睇邊食啦?
媽媽:已經應承咗請你睇戲喇喎,唔可以再花錢買爆谷喇,同埋你平時已經食好多熱氣嘢架喇,勁無益囉,所以NO WAY!
小明:唔好咁啦,嚟啦嚟啦。一係你好似平時咁,考我一D science 嘢,如果我答得出你就請我食啦!
媽媽:咁好啦~見你咁想食爆谷,就問你整爆谷背後嘅科學原理係咩。
小明:咁簡單,係人都知佢係由粟米粒整成架啦!
媽媽:係問緊你用緊咩科學原理呀,唔係問你用咩材料整成囉!
小明:Um………… 應該……應該係因為壓力所以佢就爆開囉!
媽媽:講D唔講D,都聽唔明你講 緊乜!乾燥粟米粒嘅主要成份係澱粉質,外面有堅硬嘅外皮,雖然已經整乾咗,不過裡面都仲含有微量嘅水份。當我地加熱粟米粒嘅時候,入面嘅水分就會因為受熱而慢慢轉化為水蒸氣。同時,當溫度愈高,粟米粒入面嘅氣壓就會愈大,令到粟米粒膨脹起嚟。雖然粟米粒嘅外皮堅硬,但係當入面嘅壓力超過外皮能夠承受嘅極限嘅時候,粟米粒就會爆開,水蒸氣就會喺呢個時候迅速咁喺空氣中散失;而留低嘅澱粉質會外翻,體積仲會膨脹至原來嘅20至40倍、白雪雪嘅爆谷喇。
小明:真係唔講唔知呀!但係我都叫講咗入面嘅重點丫,都係壓力果D嘢姐,something like that啦。
媽媽:你果D好明顯唔叫答咗囉!俾多個機會你喇!咁你知唔知點解有D玉米唔爆呀?
小明:呢個我估到喎,一定係因為每一粒嘅粟玉入面含嘅水份都唔同,如果水份太少,製造出嚟嘅氣壓咪唔夠大整爆個外皮囉!
媽媽:啱嘅,不過其實除咗水份,有時都會關個外皮太軟事架。好啦,你都叫答到一個原因,算你啦,俾錢你去買啦!
小明:Yeah 好嘢!不過其實買套餐好似仲抵喎,加埋可樂都只係50蚊咋。
媽媽:你唔好得寸進尺,得一想二喎。你再唔快D買,就會miss 咗個開場架喇!
小明:……………….. OK

資料來源:
http://www.carolina.com/teacher-resources/Interactive/the-science-of-popcorn/tr23952.tr

相片來源:
https://pixabay.com/zh/photos/popcorn/

17 / 03 / 2017

今日係學校嘅「年度才藝表演日」,小智每年都好期待呢一日嘅來臨,等佢可以喺台上大展身手,享受下同學嘅掌聲同埋歡呼聲。

「嘩~」,台下面嘅同學不約而同咁發出讚歎嘅聲音,面上露出一副羨慕嘅表情,大家都覺得小智嘅魔術表演好犀利、好神奇,等小智表演完,應該會衝去捉住佢偷師添!

其實,小智報咗名之後就即刻上網做咗好多資料搜集,發現原來好多魔術嘅原理都係同科學有關,所以佢就用魔術嚟包裝佢嘅表演,用科學嘅方法去完成整個演出喇。

其中一個令大家嘆為觀止嘅魔術,就係將一粒好似波子咁細嘅透明珠,放喺一盆用透明玻璃缸裝住嘅清水入面浸一浸,唔夠一秒,當小智拎返粒透明珠出嚟時,就變到好似個乒乓波咁大喇!快到好似用咗多啦A夢嘅法寶放大電筒咁,立即變大亦得,得咗!

到底小智係點做到嘅呢?原來,呢個魔術背後係運用咗折射率(index of refraction)呢個原理。折射率其實係通過實驗而得出嚟嘅一個固定值,而呢個數值就係用光喺真空中嘅傳播速度,同光喺特定物質中嘅傳播速度做對比而得出嚟嘅,例如水嘅折射率係1.33,即係代表光喺真空中嘅傳播速度係水中嘅1.33倍。每種物質都有特定嘅折射率,亦都因為折射率嘅不同,就算水同玻璃係透明嘅,我地都可以觀察到有水裝咗喺個玻璃缸入面。不過,如果兩件物件嘅折射率好接近嘅話,我地就好難用肉眼去分辨佢地喇。

而依個魔術就正正用咗依個現象:水嘅折射率係1.33,而透明珠嘅主要成份係水,折射率非常接近1.33。所以小智就算預先將一粒大嘅透明珠放咗喺缸水入面,同學仔都只會見到啲水,而見唔到粒透明珠。結果,小智咪好似變魔術咁,喺一瞬間,將粒波子咁細嘅透明珠,變咗做粒乒乓波咁大嘅透明珠囉,其實根本都唔係同一粒嚟嘅!

大家偷完師,都可以學下小智咁,運用科學知識,發揮創意,表演其他唔同嘅魔術㗎!

資料來源:
https://www.homesciencetools.com/a/water-beads-superabsorbent-polymer-science
http://hyperphysics.phy-astr.gsu.edu/hbase/geoopt/refr.html#c2
http://nerdist.com/the-magic-of-invisible-water-balls-is-science/

1 2 3 4 5  Next 

Contact Us

Address : Room 211, 2/F, Lakeside Two, East Wing Phase Two, Hong Kong Science Park Pak Shek Kok, New Territories

Tel : 2561 6149
Fax : 2565 8345
Email : ccst@hkfyg.org.hk

Directions

Science Courses Enrollment