科學與科技


18 / 08 / 2017

朝偉有天突然心血來潮想到郊外行山,感受一下新鮮的空氣,於是便去請教行山界KOL發哥。
「我要行山,要去全香港最有特色嘅山嶺!發哥,我唔怕辛苦架,最緊要景色夠靚夠壯觀!」
發哥反問朝偉:「呢個問題一年裡頭都唔知有幾多人問過啦,其實每個山嶺景色都好靚,你想睇啲咩風景先?」
朝偉:「一係唔睇,一睇就要睇最壯觀嘅景色,好似美國大峽谷咁樣就最好啦!不過香港又點會有咁嘅景點吖⋯」
發哥聽到大峽谷便立刻精神起來:「乜你唔知香港都有一個大峽谷咩?佢位於屯門青山西面,又名青山腹地,係香港其中一處最大嘅劣地(badlands),地形複雜,仲有好多景點,幾符合你要求架!」
朝偉有一點疑惑:「劣地?即係笪地俾人搞到個環境好差?我唔要人為整出嚟嘅地方,我要全自然!」
看來發哥要給朝偉一個詳細解釋:「劣地並唔係指一啲俾人過度開發嘅地呀,而係泛指一啲土層被雨水侵蝕,形成好多沖溝或深坑、寸草不生嘅地方,主要係由風化作用及化學反應等多種因素所形成。天氣乾旱時,地表因沒有水份而裂開;當雨季來臨時,雨水流入呢啲裂縫,水會沖刷裂縫旁邊嘅地表而進一步擴大裂縫面積。經過多年嘅沖刷,呢啲裂縫最後形成一個個大小不一嘅峽谷深溝。」
朝偉一邊聽發哥的解釋,一邊上網搜尋青山腹地的相片,已經深深被那獨特的景色所吸引。他對那些沒有草披的光禿禿地表大感疑惑:「咁多雨水唔係應該好適合植物生長架咩?點解而家一棵草都無嘅?」
發哥繼續解釋:「青山腹地嘅岩石群主要係花崗岩(Granite)。相比火山岩(Volcanic rock),花崗岩較容易受風化作用所影響。長年累月嘅風化作用除咗令表土嘅水份容易流失之外,花崗岩中有一少部分嘅石英(Quartz)會溶於水並產生矽酸(Silicic acid),令表面嘅土層變酸,變成一片不利植物生長、寸草不生嘅環境…咦,朝偉你去邊呀?」
「我而家就想行!快啲帶我去啦!」
發哥無奈的說:「算啦偉仔,你都係上網用眼睛去行山啦。」

*青山除青山寺至山頂一段外,大部分地區均為操炮區,市民切勿前往。

青山劣地

資料來源:
陳龍生(2016)。香港地質瑰寶GEOLOGICAL HERITAGE OF HONG KONG。雅集出版社有限公司
http://ihouse.hkedcity.net/~hm1203/lithosphere/denu-gully.htm
https://geomika.com/blog/2013/08/17/weathering-igneous/
http://hkss.cedd.gov.hk/hkss/eng/education/GS/tc/hkg/chapter4.htm
https://en.wikipedia.org/wiki/Badlands

29 / 07 / 2017

「十萬伏特!!!」

比卡超使出佢嘅絕招十萬伏特,連喺佢隔離嘅美國隊長都差啲比佢電到,但係同樣企喺比卡超隔離嘅鋼鐵俠就咩事都無。大家都係超級英雄,到底點解會咁嘅呢?

原來關鍵就在於佢身上套衫!

鋼鐵俠之所以能夠承受比卡超嘅十萬伏特電力,全因為佢身上嗰套用金屬造嘅盔甲應用咗法拉第籠(Faraday cage)嘅原理。法拉第籠係一個用導電物料體造嘅籠,由於電荷與電荷之間有很強的排斥力,因此電荷只會在籠的表面流動,無論籠外有幾多隻比卡超向住個籠使出十萬伏特,電流都只會喺籠外流過,而唔會流向籠內,所以籠內嘅人唔會有任何損傷。


(按圖放大)

但要注意,雖然法拉第籠嘅外型好似鳥籠,但係就必須放喺地上而唔可以拎喺手,咁先至能夠將個籠接地,讓電流向地,以地作為電嘅終點。

現實世界當然唔會有小精靈用十萬伏特電力攻擊敵人,但臨近夏季嘅雷雨天氣,頻密嘅雷電現象亦會對人類嘅生命構成威脅。不過,只要你好似鋼鐵俠咁,有一套盔甲保護你,即使喺四野無人嘅空地被閃電擊中,都唔一定會有生命危險。又或者留喺車入面,都一樣無事架,因為車嘅設計,其實亦係一個法拉第籠,車嘅金屬外殼能夠令電只係喺籠外流向地,從而可以保護車入面嘅人。

注意:高電壓會對人造成生命危險,所以即使有鋼鐵盔甲都唔好立亂嘗試接觸高電壓。



資料來源:
https://en.wikipedia.org/wiki/Faraday_cage
http://chiuphysics.cgu.edu.tw/yun-ju/cguweb/sciknow/phystory/Faraday/FaradayCage/FaradayCage.htm

21 / 07 / 2017

最近經常落雨,令人心情變得鬱悶。討厭落雨嘅發哥同發嫂每次出完門都濕哂咁返嚟,所以今日佢地決定一次過買定聽日、後日同大後日嘅嘢食。

走入一間烘焙店,當發哥揀緊聽日嘅早餐時,發嫂就被右邊櫃枱嘅冬甩吸引咗過去。年輕時發嫂最鍾意食冬甩,但依家哩啲高熱量食品只可以望梅止渴喇。發哥見發嫂目不轉睛望住啲冬甩,於是都走埋過去。

「如果你估到冬甩點解係圈形的話,咁聽日早餐就獎你食冬甩啦!」發哥一邊用調皮口吻發問,一邊準備將冬甩夾落盤。
「係咪因為食太多好滯,圈形就啱啱好?」發嫂開始積極思考。
「係咪因為方便串住一齊炸?」「定係方便拎住食?」發嫂已經好心急想知道有無估中,但係發哥微微彎低腰望住啲冬甩,隻手仍然郁都唔郁。
「都唔係!中間哩個窿其實係方便炸熟個冬甩架。」

原來當冬甩一落熱油鑊,佢就會由側邊開始熟起,熱力會慢慢由外傳到內。當冬甩中心位置都熟透嘅時候,外圍就會因為過份加熱而變燶。但若果將中間部分拎走,剩低一個圈形,就可以增加表面面積,令熱力平均分佈喺冬甩嘅每個角落,咁樣每個位置炸熟嘅時間就會接近啲喇。



「原來炸冬甩都有咁多科學學問......」發嫂有啲唔甘心,就咁錯過咗食冬甩嘅機會。
發哥又點會俾發嫂唔開心呢!於是發哥開始動手夾冬甩。
「俾多次機會妳啦!冬甩點解係圈形就解答咗喇!咁我又係咩形呢?」
「一定係有型啦!」發嫂今次自信滿滿咁回答,然後喺發哥手上拎過盤向收銀台方向行去。
發哥好滿意咁跟喺發嫂後面偷笑,而佢地散發出嚟嘅甜意比冬甩更甜呢!

資料來源:
http://wonderopolis.org/wonder/why-do-donuts-have-holes

14 / 07 / 2017


維尼同小豬又去旅行啦!今次佢哋飛越北太平洋,坐飛機去日本浸溫泉。

小豬:「好想快D食飛機餐呀!」

維尼:「都唔知有咩好期待,成個trip最難食嘅就係飛機餐架啦!」

小豬:「肚餓起上嚟咩都好食架啦!」

維尼:「有邊次旅行嘅飛機餐係好食架?」

小豬:「可能今次係例外呢~」

登機大約一個鐘後,一陣陣食物嘅香味飄到維尼同小豬嘅鼻,飛機餐好快就送到佢哋面前。小豬大啖大啖將食物放入口,相反維尼試完一啖就放低筷子。

維尼:「你真係覺得好食架?」

小豬:「唔好食架,但係我真係太肚餓啦,唔食唔得!話時話,點解你未食就知D飛機餐難食嘅?」

維尼:「因為我唔係豬,唔會咩都話好食~」

小豬:「好呀~咁今個trip你咩都唔好食,我幫你食晒佢!」

維尼:「唔好呀~講你聽點解啦~其實可以用科學角度解釋嘅~因為當飛機上升,機艙裡面嘅氣壓同濕度會降低。喺呢種咁乾燥同低壓嘅環境下會影響我哋嘅味蕾,令我哋對甜味同鹹味嘅敏感度降低大約30%。」

小豬:「咁其他味道,例如酸味呢?」

維尼:「根據研究顯示,除咗甜味同鹹味,其他嘅味道係唔會受影響嘅~」

小豬:「咁如果只係影響甜味同鹹味嘅感覺,都應該唔會太難食啫,但事實又唔係咁嘅?」

維尼:「我哋平時之所以感覺到食物嘅味道,除左因為有味蕾之外,有80%嘅感覺係黎自嗅覺,我哋要靠鼻孔裡面受粘液滋潤嘅嗅覺細胞先可以聞到氣味。但係機艙呢D咁乾燥嘅環境,感覺氣味嘅細胞會無咁sensitive,令到我哋覺得食物嘅味道比平時淡兩倍。」

小豬:「唔怪得次次食親飛機餐都覺得咁難食啦!咁我地留返份飛機餐到落機嘅時候先食咪會好食D囉!」

維尼:「可能架~亦都有研究指出,喺機艙呢D嘈吵嘅環境下食嘢都會令我哋對食物嘅甜度同鹹度嘅感覺降低。」

聽完之後小豬就放低餐具,攞個袋出黎準備將佢同維尼份飛機餐打包等落機嘅時候再食。

維尼:「做咩呀?你真喺諗住留返落機先食呀?」

小豬:「係呀,試下係咪真係好食D呀嘛!」

維尼:「好啦咁,你試完記得話我聽好唔好食啦喎!咁我就負責幫你試下日本D鰻魚飯呀、刺身呀同和牛好唔好食啦!」

好有科學精神嘅小豬一落機真係食晒兩盒已經凍晒嘅飛機餐,至於好唔好食,我諗唔洗我講,你哋應該都知答案啦!

資料來源:
http://www.bbc.com/ukchina/trad/vert_fut/2015/10/151022_vert_fut_flight-food-tastes-weird
http://hk.apple.nextmedia.com/realtime/supplement/20170122/56198363

相片來源:
https://lh4.googleusercontent.com/-s_-0gNnCp5s/T7NdAF44GxI/AAAAAAAAKTE/7dBjBVCj5Ik/s400/L1060310.JPG

30 / 06 / 2017


晚飯過後,春嬌如常地看她最愛的韓劇;而志明則在旁做掌上壓,説吃得太飽,想做些運動,保持「倒三角身形」來迎接夏季的陽光。

當春嬌看到韓劇中男主角穿泳褲的片段時,再看看身旁的志明,不禁偷笑說:「你睇下人地嗰八舊腹肌~你都係唔好作無謂嘅掙扎喇!乖乖哋過嚟陪我煲劇啦!」
志明突然認真起來:「依家我冇咩!?」立即拉起背心,露出一個小肚腩。
春嬌大笑:「你縮極都見唔到有八舊囉!」
志明反駁:「腹肌我係有嘅,只不過稍微俾另一層肉襟住咗啫!不過其實腹肌都唔係好勁啫,你知唔知我地身體邊舊肌肉先至係最勁吖?」
春嬌疑惑:「唔知呀?咁係邊舊呀?點為之勁先?」

成功轉移春嬌的視線,志明沾沾自喜:「依個問題問得好!如果肌肉越大就係越勁嘅話,最勁呢就應該係我地嘅臀大肌(Gluteus Maximus),即係我地pet pet嗰個位!」
春嬌笑說:「哈!我仲以為係胸肌添!原來pet pet先係最大舊嘅肌肉!咁你唔好成日話人個pet pet大喇!」
志明解釋:「我講嘅係pet pet嘅肌肉,唔係出面層脂肪喎!臀大肌好重要架,平時我地行路同跑步,keep住個身體直立都係靠佢!不過肌肉個size大又唔一定話係最大力喎!」

春嬌追問:「咁最大力係邊舊肌肉呀?」
「可以對身體以外嘅物件施力最大嘅肌肉,就係我地嘅嚼肌(Masseter),即係控制我地顎骨,用嚟咬同咀嚼食物時候用嘅肌肉!」志明一邊輕撫春嬌的臉頰一邊說:「嚼肌個size雖然好細,深藏喺面珠墩入面,不過佢可以製造200磅嘅力架!」
春嬌恍然大悟:「唔怪得戲入面啲人唔夠打嘅時候都會出口咬人啦!原來真係咁大殺傷力嘅!」
志明立即裝可憐:「係呀!所以你平時唔好無啦啦咬人手臂喇!」
春嬌嘟著咀說:「咩喎,人地好細力咬咋嘛!呵返你囉!」

志明笑道:「算你啦!不過我地身體仲有啲肌肉係好勁架!每日24小時...」
春嬌插咀:「我知呀!係心臟吖嘛!心臟嘅肌肉(Cardiac Muscle)喺我地未出世已經開始工作;仲唔似得一般嘅骨骼肉(Skeletal Muscle)咁,長期收縮出力泵血都唔會攰!每一日仲會泵超過9000公升嘅血添!」
志明讚嘆:「嘩!你咁叻豬嘅!?不過仲有樣嘢你講漏咗喎!」
春嬌疑惑:「乜個心唔係剩係用嚟泵血啫咩?」
志明凝視著春嬌:「我個心仲會用嚟24小時掛住你架!」
春嬌「反了白眼」但面帶甜笑:「哥仔,掛住我係用個腦囉!唉~你都係唔好阻住我睇oppa喇,返房練你嘅倒三角吧啦!」
志明一個轉身箭步上前,坐在春嬌的身旁說:「唔得喎,我要陪你煲劇嘛!」
就這樣,春嬌一面看著韓劇,一面抱著志明的二頭肌與三頭肌,過了一個溫馨的晚上。

資料來源:
https://www.loc.gov/rr/scitech/mysteries/muscles.html
http://zidbits.com/2011/02/what-is-the-strongest-muscle-in-your-body/

24 / 06 / 2017

在一個晴朗的星期天,廣志計劃帶美冴及小新到郊外遊玩,吸收一下新鮮空氣。
「去郊外好呀!我要BBQ!燒雞翼我鍾意食!要有咁多蜜糖得咁多蜜糖吖唔該!」小新跟媽媽嚷著說。
美冴無奈的說:「邊有人咁熱都去燒嘢食㗎?其實咁熱,最好應該去行下商場,食杯雪糕。」
廣志沒有理會美冴:「小新呀,琴日先至食完烤豬扒,食得太多燒烤食物對身體無益㗎,分分鐘會吸收太多致癌物引致大問題呀!」
美冴一聽到致癌即時非常警覺:「吓!我以為食得多肉類最多都只係會肥添!點解會致癌架?」
廣志知道是時候可以展示自己豐富的科學知識!「是咁的,大部分食物都係由有機化合物所組成。當呢啲有機化合物喺高溫下加熱,就有機會變成其他物質喇,當中最危險嘅物質就係一種叫多環芳香羥(Polycyclic Aromatic Hydrocarbons),簡稱 PAHs 嘅化合物。PAHs 含有兩個或以上嘅苯環(Benzene Ring),係碳氫化合物,喺煤、石油中都可以搵到,不過喺燒烤肉類入面所搵到嘅 PAHs 都係燃燒過程當中製造出嚟嘅。」
「咁同致癌有咩關係?」美冴仍然對致癌非常敏感。
廣志見美冴非常用心聆聽,更詳盡地解釋:「歐美多個權威組織,包括世界衛生組織嘅研究,都指出部份PAHs有機會引致癌症,當人食咗呢啲含有PAHs嘅食品之後,呢啲物質就會轉化成活性代謝物(Active Metabolites),有機會同DNA結合,引致癌變。」
美冴非常驚訝:「咁以後都唔可以食燒烤食品喇!」
廣志:「咁又唔駛完全唔食,按香港食物安全中心建議,只要唔好進食過量,避免食燶咗嘅食物,同埋燒烤前,先切咗肉上面見到嘅脂肪,都可以減低食物表面上 PAHs 嘅含量。」
小新這時突然插嘴:「吓!咁危險!我都係唔BBQ喇!都係食叉燒飯啦!」
廣志和美冴異口同聲道:「咁有咩分別?」

燒味究竟是否含有 PAHs?大家可以到以下網址,比較各種燒味的 PAHs 含量:
http://www.cfs.gov.hk/tc_chi/programme/programme_rafs/programme_rafs_fc_01_06_05.html


資料來源:
https://en.wikipedia.org/wiki/Polycyclic_aromatic_hydrocarbon
https://www.atsdr.cdc.gov/csem/csem.asp?csem=13&po=11
http://www.cfs.gov.hk/tc_chi/programme/programme_rafs/programme_rafs_fc_02_09.html

16 / 06 / 2017

之前有一款手機遊戲推出,旋即掀起熱潮,大家都瘋狂咁捉精靈。你又有無諗過喺現實生活裡面都養返隻精靈呢?

不過可能你會話人哋啲精靈又得意又有唔同特性,連龍都有得養,點比呢?而家就為大家介紹一隻同啲精靈有得「揮」嘅寵物!


https://www.youtube.com/watch?v=PRNVi-8TWx0

https://www.youtube.com/watch?v=3xaNsaKN6hs

佢就係俗稱「六角恐龍」嘅寵物喇,係咪好得意呢?佢望落有啲似娃娃魚,但全身上下都冇鱗片,更古怪嘅係佢身上面有四隻小短腿,頭上有六隻角,身後仲拖住一條大尾巴,而且會發出「嗚帕魯帕」嘅奇特叫聲。其實佢嘅正名應該叫「墨西哥鈍口螈」(學名:Ambystoma mexicanum),係墨西哥嘅特有品種,屬於兩棲類動物。佢嘅頭部兩側分別有三根鰓,望落去好似有六隻角咁,所以就俾人叫佢做「六角恐龍」囉。

六角恐龍有好多特別之處,其中一個特點就係所有女人都好想要嘅不老容顏喇(其實男人都想要)!一般兩棲類動物都會經過變態(metamorphosis),由幼態發育到性成熟形態,例如蝌蚪會變態成為青蛙,幼體嘅時候會用鰓呼吸,然而鰓會喺成長過程中逐漸消失,最後發展成用肺部呼吸。但係六角恐龍即使成熟後仍然保持水棲幼體形態,繼續以鰓呼吸,仲可以keep到個得意樣。佢仲有獨特嘅復原能力,受傷嘅時候亦都唔會留有任何傷痕,甚至可以重新生出重要嘅器官(例如肢體、腦部),所以好多科學家都着手研究佢架!

講咗咁耐,點先養得到六角恐龍先?佢雖然係瀕臨絕種動物,但可以人工大量繁殖,所以坊間唔難搵到,價錢亦都唔算貴。不過要養佢就有好多嘢需要注意喇!首先佢係兩棲動物,需要幫佢準備一個水溫保持喺攝氏二十四度以下嘅水缸。同時佢係肉食性動物,主要以昆蟲或者小魚等有腥味嘅動物為食糧,而且進食頻繁,餵食後殘餘食物好容易會令水質變差,所以需要一個效能較好嘅過濾器,否則水質變差好易令六角恐龍病架。佢亦都唔可以同其他水中生物混養,因為其他水中生物好易會當咗佢啲鰓係食物。

無論點都好,養任何寵物都絕對唔係草率嘅事,養之前記住要諗清楚啊!

資料來源:
https://zh.wikipedia.org/zh-hk/%E5%A2%A8%E8%A5%BF%E5%93%A5%E9%92%9D%E5%8F%A3%E8%9E%88 https://kknews.cc/zh-hk/science/qp8z2r.html

09 / 06 / 2017

「本產品螢幕用上藍寶石玻璃…」

為何電子產品的螢幕要用上藍寶石呢?

藍寶石水晶玻璃(Sapphire Glass) 可以說是近年材料科學界的新寵兒,它被冠以「藍寶石」這個名字不是代表它是藍色的寶石,而是在化學角度上它跟天然藍寶石的成分一樣,都是由氧化鋁(Aluminum Oxide, Al2O3) 晶體所組成。氧化鋁在於自然裡界結晶化時,由於它包含了一些其他物質,因此形成了不同顏色,如天然藍寶石的藍色就是因為晶體中含有少量的鈦(Titanium) 及鐵(Iron)。人工合成的藍寶石晶體是將純氧化鋁原料在高溫下結晶化而製成,由於沒有混入其他雜質,因此人工合成藍寶石晶體大多是透明的,可以讓紅外線至紫外線的波長穿透,適合用於不同電子產品的螢幕上。

藍寶石水晶玻璃除了因為它是透明而適合用於電子產品的螢幕外,更重要是因爲它是世界上數一數二堅硬的物料。礦石界中的硬度標準一般會使用由德國礦物學家腓特烈.摩斯(Friedrich Mohs) 所創立的摩氏硬度(Mohs Scale)。根據摩氏硬度標準,世界上最硬的天然礦石為鑽石;藍寶石及紅寶石等稱之為剛玉(Corundum) 則為第二硬的礦石。在衡量硬度與製造成本後,藍寶石水晶玻璃成為電子產品螢幕的最佳物料,日常生活中使用的物品都難以對它損毀分毫。

縱然氧化鋁並不是一種十分昂貴的物料,人工藍寶石玻璃的成本最主要是來自製作上的問題,因為它是世界上第二堅硬的礦石,當需要切割成不同形狀時就要用比它更堅硬的東西去切割,而且它非常容易脆裂,所以不論是所使用的工具以及在製作過程中都有大量原材料因脆裂而被消耗,都引致人工藍寶石玻璃的價格仍然較為昂貴,不是人人都覺得有需要。

您身上的電子裝置又有多少地方已經用上藍寶石水晶玻璃?


資料來源:
https://en.wikipedia.org/wiki/Sapphire https://en.wikipedia.org/wiki/Mohs_scale_of_mineral_hardness http://www.businessinsider.com/how-sapphire-glass-screens-are-made-2014- 9

03 / 06 / 2017

大清早,媽媽如常為心美準備早餐和午飯盒。

心美:「媽媽早晨…」

媽媽轉頭看見心美如喪屍般嘅容貌嚇一跳:「嘩!你個黑眼圈同熊貓差唔多大,琴晚幾點瞓呀?」

心美:「今日要present,所以搵資料搵夜咗囉‧‧‧‧‧‧」

媽媽:「真係搵資料定同人WhatsApp 呀?」

正在喝橙汁的心美差點被嗆到:「咳‧‧‧咳‧‧‧真喺搵資料呀媽媽,唔好咁多疑啦!」

「家姐都唔肯瞓覺嘅,佢電話咁光搞到我都瞓唔到。」妹妹忍不住控訴。

「Sh……你又話唔會同媽媽講嘅,你唔洗旨意我買隻熊仔俾你呀!」感到被妹妹出賣,決定懲罰她。

媽媽:「你兩個唔洗再細細聲講啦,兩個都夜瞓,兩個都唔啱!成日都同你哋講睡眠時間同質素都好重要架嘛,瞓覺前唔好用電話又唔聽!」

妹妹:「瞓覺之前唔用電話真喺會好瞓D咩?」

「喺正常嘅情況下,大腦嘅松果體會隨住環境變得陰暗而開始釋放褪黑激素(Melatonin)。呢種夜間賀爾蒙會減低人嘅警覺性,幫手培養睡意令我哋易D瞓著。」媽媽繼續說:「但係手機螢幕發出嘅光會刺激眼睛,視網膜上面嘅感光細胞偵察到依啲光,就會send message 俾大腦。松果體收到呢個訊息會以為我哋想繼續做野,就會停止釋放褪黑激素啦。」

心美:「咁即係話只要感光細胞偵察到有光都會令松果體製造少D褪黑激素?咁同我地平時唔記得熄燈瞓覺係咪差唔多呀?」

媽媽:「其實我地嘅感光細胞對於電腦或者電話D螢幕所發出嘅短波長藍光特別敏感,如果我哋瞓覺前兩個鐘接觸到呢種光線,就會更加降低褪黑激素嘅濃度,令我哋更加難瞓著喇。」

心美:「唔緊要啦!我咁青春,適應力會強啲!一熄個mon就會好快製造返啲褪黑激素架喇!」

媽媽:「唔係囉,藍光對你哋後生仔影響仲大呀!比起大人,你地只要受到少量藍光嘅刺激就會抑制更多褪黑激素。」

妹妹:「唔怪得家姐朝朝都咁嘅樣啦,每晚都唔夠瞓,點化妝都無用啦!」

如果你都想瞓一覺好嘅,第二朝有個靚樣見人,由今晚開始瞓覺之前就唔好再玩手機喇!


資料來源:
https://technews.tw/2014/09/03/blue-light-affect-sleep-quality/ http://www.howitworks.com.tw/index.php/content-views/186-the-science-of-insomnia

26 / 05 / 2017

大雄同靜香正在討論去邊度旅行嚟慶祝結婚10周年。

大雄:不如我地去沙巴潛水,曬下太陽丫!

靜香:唔好啦!曬得多好傷皮膚架!

大雄:咁不如去新西蘭玩笨豬跳丫!

靜香:跳乜鬼丫!你咁細膽,未跳落去都已經嚇死咗啦!

大雄:Er…咁又係... 咁去日本睇櫻花呢?

靜香:都5月喇喎,通常見其他人都係3、4月去睇,櫻花花期又得一個星期左右,呢個時間仲邊有得睇呀?

大雄:櫻花開花唔係視乎月份嘅,而係視乎溫度架嘛!東京、大阪呢D比較南面嘅地方就係3、4月開花,但係日本北面氣溫比較遲先至回暖,所以例如北海道咁,有機會去到6月都仲有櫻花睇架!

靜香:原來係咁!我淨係知道櫻花有好多種,有D係白色,有D係粉紅色,仲有種叫秋櫻,佢係秋天先開嘅櫻花丫嘛!

大雄:一半正確啦!秋櫻其實唔係櫻花黎架,秋櫻正式係叫大波斯菊,完全係另一個品種嚟,而佢地喺演化過程嘅關係都比較遠。

靜香:哦!咁我地不如走去睇夜櫻丫!聽個名應該係夜晚先開,好浪漫呀!

大雄:睇你點睇啦,夜櫻只係正正常常一棵櫻花樹啫,夜晚D人開燈照住佢,咪夜櫻囉!不過其實呢個係日本人賞花嘅習俗,通常佢地會喺開滿花嘅櫻花樹下飲野食野,好開心架!

靜香:飲飲食食就最啱我喇,係咪有得食櫻花架?我未食過櫻花呀!

大雄:我都未食過櫻花,不過櫻花樹嘅果實就食過,你都肯定食過啦!

靜香:未喎,咪住先,櫻花樹邊有果實架?見親都淨係得花咋喎!

大雄:無錯!大部分觀賞用嘅櫻花樹的確係唔會結果實,但係其實好多品種嘅植物都可以分類為櫻花樹,其中少部分俾人類經過栽培後就會結果實,果D又大粒又甜嘅車厘子咪係櫻花樹嘅果實囉!

靜香:唔怪得車厘子又叫做櫻桃啦!Cherry blossom (櫻花) 原來係會結出 Cherry (車厘子)!

大雄:係呀!D車ly…

靜香:係Cherry呀…

大雄:英文差丫嘛... D Cher厘子其實仲係布冧、桃同杏嘅近親添!所以佢地都好似樣架!

靜香:係喎,佢地全部都係得一粒硬嘅核,核外面係又甜又多汁嘅果肉!話時話,點解大雄你聰明左咁多嘅?

大雄:哈哈哈!因為... 頭先我用左「如果電話亭」,我話:「如果靜香同我嘅智商交換」,所以我就咁醒啦!

靜香:唔怪得我蠢左咁多啦,好衰架大雄!


資料來源:
https://en.wikipedia.org/wiki/Cherry_blossom

1 2 3 4 5  下一頁 

聯絡我們

地址 : 香港新界白石角香港科學園二期東翼浚湖樓2樓211室

電話 : 2561 6149
傳真 : 2565 8345
電郵地址 : ccst@hkfyg.org.hk

路線指引

科學工作坊報名表格