你預備好有生物辨識功能的聖誕禮物未?

踏入12月,就是各位情侶頭痛的日子,因為聖誕節快要來了,究竟買甚麼聖誕禮物給自己的最愛呢?春嬌為了不受頭痛之苦,唯有單刀直入問志明意見。

春嬌問:「喂,你聖誕想要咩禮物呀?唔想諗呀,俾啲tips嚟啦!」
志明心諗:「唓,如果我問佢依個問題一定俾佢話我冇心思啦!」繼而回答:「你講啲咁嘅嘢嘅,你送咩俾我都鍾意㗎,使乜咁苦惱喎!」
春嬌反問:「咁你會送咩俾我呀?」
根本沒有思考過這個問題的志明笑道:「我都知你個目的係咁嫁喇,不過唔話俾你知,總之一定係好貼身同貼心嘅嘢啦!」
春嬌自我陶醉地說:「等我估下先,咁一定係最新可以有facial detection嘅生果手機喇!Baby,你又知我想轉電話嘅?你真係有我心呀!」

志明對此突如其來的攻擊變得手足無措:「Facial detection依啲嘢都唔係咩新技術啦,facebook一早都可以自動tag你相入面啲friend啦?」
春嬌繼續陶醉地說:「但係今次可以用嚟開電話喎,幾得意呀!」
志明想轉移視線:「咪住先,你知唔知facial detection係點運作呀?」
春嬌回答:「緊係知啦!咪就係個電話會認到我個靚樣囉!」
志明解釋:「科學啲嚟講呢,主要係分偵測、面相重組同確認三個步驟。首先電話要偵測到你個樣係喺邊個位,知道鏡頭前係一個人嘅面孔之後,就會分析面孔上眼耳口鼻嘅相對位置,並以眼睛為主要分析目標。例如:細眼、粗眉同窄鼻嘅人,佢嘅面相同一個大眼、幼眉同闊鼻嘅人會好唔同。最後,就係會根據電話入面已有嘅database作對比,從而確認鏡頭前係咪手機嘅主人。」
春嬌皺眉道:「乜你講到咁複雜㗎?」
志明繼續解釋:「唔止係咁,facial detection都有佢嘅限制㗎,例如有唔平衡嘅燈光,或者拍攝嘅角度太古怪,都會影響到準繩度!哎吔,唔知會唔會認唔到你落妝個樣呢?」
春嬌打了志明一下:「你係咪想死呀?」
志明笑道:「講笑咋,想講嘅係,世界上仲有好多生物辨識嘅方法會準確好多!」
春嬌好奇地問:「咩係生物辨識呀?」


(按圖放大 gif 檔案觀看模擬 facial detection 動畫)

志明解釋:「生物辨識Biometric即係以一個人獨一無二嘅生理特徵去辨識身分,例如每個人嘅指紋同講嘢嘅聲音都係獨一無異,所以可以用嚟做生物辨識。」
春嬌眨一眨眼:「哦,我知喇,對眼都好似得嫁喎!」
志明讚賞:「醒目女!眼方面主要係辨識虹膜或者眼裡面視網膜嘅紋理,所以同指紋一樣,都係比facial detection更加準確㗎!我上次睇完電影『獵殺星期一』
嗰陣咪講過囉,如果啲人一早用指紋嚟辨認嗰七個姊妹,一早就知係七個唔同嘅人啦!」
春嬌反駁:「你咪當我唔識嘢喎,佢哋七個係同卵孖生,errrr係同卵七生嘅姊妹喎,DNA都一樣啦,指紋點會唔同喎!」
志明再解釋:「其實指紋嘅形成除咗係基因控制之外,亦都會受唔同環境因素所影響,例如喺媽咪個子宮入面,已經係一個環境。BB嘅指紋形成會隨壓力變化而有所不同。又或者隻手仔係打開定揸住拳頭,都可能影響咗指紋嘅發展㗎!而且我哋嘅指頭出世之後會繼續生長,喺去到青春期之後指紋先唔會再改變㗎!」

春嬌看著自己的指頭說:「原來係咁,指紋都幾得意喎!」
志明因勢利導:「緊係啦,所以你而家部用指紋解鎖嘅手機,背後係蘊含咗好多科學嘅智慧㗎!既然咁好,邊捨得換喎!」
春嬌恍然大悟:「哦,你講咁耐,都係唔想買新手機俾我啫!」
志明笑言:「你想要facial detection咋嘛,送我俾你咪得囉,唔單止你個靚樣呀,你身上所有嘅Biometric我都可以認得到㗎!最重要係……」
春嬌追問著:「係咩呀?」
志明握著春嬌雙手,四目交投地說:「就係我腦入面只有你一個database咋,只會辨認到獨一無二嘅你,只有你先可以撻著我,願意為你效勞,做乜都得,功能仲特多添!將我全面私有化之後,其他人我就完全認唔到嫁喇!」
春嬌甜甜地笑道:「係喇,最叻係你喇!」

在甜言蜜語下,志明暫時過了一關!聖誕快到了,最終的結果將會是怎樣呢?

資料來源:
http://theconversation.com/facial-recognition-is-increasing…

相片來源:
https://cdn01.theintercept.com/…/2016/10/FacialRecLoop02.gif