最近大雄問叮噹借咗樣法寶,等佢可以睇到香港嘅電視劇!而家佢每晚都掛住睇電視,仲迷上咗卧底所用嘅暗語添!近日,佢就自創咗一套專屬暗語,方便佢同靜香講悄悄話。

今日小息嗰陣,大雄同靜香講:「靜香,你好碲化銅呀!」

靜香聽到之後好開心咁坐返自己位,咁啱行過聽到呢句說話嘅出木杉同學就當然唔明大雄講咩啦,但聰明嘅佢就估到係同化學元素有關嘅,所以佢返到屋企就搵咗元素週期表嚟解開大雄同靜香之間嘅密碼喇。

原來元素週期表包含好多唔同嘅資料,其中大雄就運用各種元素嘅化學符號去做暗語嚟同靜香溝通,而佢所講到嘅碲化銅就即係將碲(Te) 同銅(Cu) 兩個元素嘅化學符號痴埋當做一個英文生字去讚靜香喇。不過,出木杉同學就覺得大雄竟然認識碲化銅(CuTe) 呢種化學物質,應該有其他意思嘅!所以就繼續搵碲化銅嘅資料喇,點知佢發現原來碲化銅係一種近年科學家仍然努力研究緊嘅化學物質,參考資料都唔多,估計大雄應該都無相關嘅資料,於是佢就改為搜尋碲同埋銅兩種元素嘅資料,誓要搵出大雄同靜香之間嘅密碼背後嘅意思!

佢首先係元素週期表入面搵到碲,發現碲係屬於類金屬(Metalloid) 嘅類別,既唔係金屬,亦唔係非金屬,而係一啲特性介乎金屬同非金屬之間嘅元素,例如係導電性方面,類金屬嘅導電能力較金屬弱,亦都與非金屬係絕緣體唔同。而且碲係一種比較稀有嘅元素,主要添加到鋼和銅之中製成為合金,以增加金屬嘅硬度,同埋提升材料嘅耐蝕性及耐磨性。

而銅就係其中一種最普通嘅金屬物料,人類早喺幾千年前經已發現銅,並且用銅嚟製作唔同嘅物件。最為人熟悉嘅用途就係製造銅錢,直到而家仲有國家嘅貨幣係用銅嚟鑄造;另一方面,學校裡最常見同銅有關嘅化學實驗就係銅與硫酸反應所產生藍色嘅硫酸銅,係學習晶體生成嘅常用化學物,唔通大雄想送粒藍色水晶比靜香?不過硫酸銅係重金屬鹽,進食會有危險,斷估大雄唔會識得點樣處理有毒嘅化學物品,而且又同碲無關係,到底個密碼代表啲咩呢?

出木杉同學搵嚟搵去都搵唔到碲化銅究竟有咩深層次嘅含意,決定直接問靜香,點知原來大雄講得出碲化銅,都只係叮噹教佢用嚟氹靜香嘅技倆,真係純粹利用元素嘅化學符號去代替個英文生字(CuTe,可愛)。相信以大雄嘅能力,呢個暗語應該都剩係用到一次就會比佢忘記㗎喇!

資料來源:
https://zh.wikipedia.org/…/%E5%BE%B7%E7%B1%B3%E7%89%B9%E9%8…
https://zh.wikipedia.org/…/%E5%85%83%E7%B4%A0%E5%91%A8%E6%9…
https://en.wikipedia.org/wiki/Metalloid
http://www.rsc.org/periodic-table/element/29/copper

 

立即捐款 支持青協

 

 

我想立即捐贈

支持青協