動物園嘅北極熊,點解會重重複複咁來回走動?

暑假就到了,如果嚟緊打算去旅行參觀動物園嘅你,就要留意一下呢篇科學文章啦。

筆者喺先前,到天王寺動物園參觀。當中令我印象最深刻嘅就係動物園入面嘅小明星 – 北極熊。首先,北極熊身處喺園區嘅露天位置,當我見到嘅時候,就不禁覺得汗流浹背。北極熊本身生活喺嚴寒嘅北極,而日本5月尾嘅氣溫高達25度,對於北極熊嚟講可謂相當炎熱。除此之外,另一樣令我感到驚奇嘅就喺北極熊嘅行為。

經過短時間嘅觀察後,我留意到北極熊會不斷喺籠內有規律地來回走動。每當走到籠嘅盡頭時,北極熊就會抬一抬頭,然後再走到籠嘅另一邊。我當時嘅感覺就喺覺得太殘忍啦,北極熊喺烈日當空下,仲要不停咁走動,會相當辛苦。我然後諗一諗,會唔會係因為動物園嘅訓練員,訓練到北極熊識得喺籠入面不斷走動,令到遊客可以觀賞到北極熊呢?

原來,呢個現象係一種動物行為,叫做「刻板行為」– 即重複地進行單調行為。首先,「刻板行為」可被視為動物嘅強迫症,發生喺圈養動物身上。所謂圈養動物,係指動物從原先無拘束嘅野外環境,轉移到人造嘅小空間,而動物嘅習性必然會跟著改變。如果動物適應不良,就會出現「刻板行為」。

「刻板行為」有以下幾種例子,例如:重複行走、重複舔毛、喺嘴巴空無一物時重複咀嚼、甚至自殘等行為。「刻板行為」有機會令到動物體重下降及身體受傷。因此,動物園需要改善動物嘅居住環境,減低發生「刻板行為」嘅可能性。

「環境豐富化」為其中一個有效方法,以減緩「刻板行為」。動物園可透過增加不同嘅道具、石頭、植被、嗅覺及聽覺等刺激,以塑造動物喺野外嘅生態。再者,動物園都要經常替換物件嘅位置,保持動物對環境嘅新鮮感。

另外,為左避免動物漸漸忘記原有喺野外嘅覓食行為,飼養人員會透過隱藏食物,例如好似喺動物園中嘅美洲黑熊,透過藏蜂蜜來訓練黑熊覓食,以減少「刻板行為」嘅發生。

最後,大家如果有機會去大板天王寺動物園,可以再留意一下北極熊嘅行為。因為,園區喺今年初誔生咗一隻小北極熊,希望小北極熊可以令大北極熊嘅生活有改善,唔會再有「刻板行為」啦!

「刻板行為」相關片段:
https://www.youtube.com/watch?v=igrMVWqiAio

圖片來源:
http://blog.zaq.ne.jp/zoo_tennoji5/category/10/