小新一家打算暑假去美國三藩市探親,由於今次將會係小新第一次搭飛機,所以小新特別興奮仲問媽媽拎咗張來回直航機票嚟睇。觀察力強嘅小新突然發現:「計咗兩地時差之後,點解去程由香港飛去三藩市只需要12小時35分鐘,但係由三藩市飛返香港就要14小時35分鐘,足足飛耐咗2個鐘,點解嘅點解嘅?」

美亞媽媽一向都好鼓勵小新多動腦筋,當然唔會直接答小新啦:「你估下點解?」

「嗯,莫非因為去程同回程嘅飛行路線唔同?不過飛機咁食油,無理由有啲短嘅路線唔飛,特登要飛遠啲先返嚟㗎喎!」

小新繼續說:「嗯,會唔會係因為地球自轉呢?」

「你試下再解釋多啲?」

「嗱,地球就係由西向東自轉,如果飛機向西飛會同地球自轉抵消咗,咁咪會飛快啲,而向東飛就會飛慢啲,因為要追返個地球轉嘛。」

「你好似有啲道理。不過,香港飛去三藩市係向東飛,係快過由三藩市向西飛返香港喎。」

「係喎,咁真正嘅原因係咩呢?」

「雖然地球係轉動緊,地面嘅移動速度好快、每小時達1670公里。不過我地唔會感受到,因為我地都係以同地面相同嘅速度一齊移動。而飛機都係一樣,係以相對於地面上空氣移動嘅速度飛行。情況就好似喺行緊嘅火車入面,如果你以相同速度由車頭行到去車尾所需要嘅時間,係應該同由車尾行返去車頭嘅時間一樣,因為當你身處喺火車入面,你應該感受唔到火車嘅均速移動。至於點解向東飛會快啲,係由於中緯度地區嘅高空有股由西向東嘅高速氣流(Jet Stream),當飛機向東飛嘅時候就會飛去高速氣流嘅路線,借助呢股氣流令飛機快啲到達目的地。」

「嘩,媽媽你真係好叻呀!」

「小新都唔差,因為講到底點解會有高速氣流嘅出現都係同地球自轉,加上地球表面不同緯度接收太陽不同程度嘅照射有關嘅。」

「好!咁等我坐飛機嗰陣留意下架飛機嘅速度先!」

 

資料來源:
http://curious.astro.cornell.edu/about-us/40-our-solar-system/the-earth/climate-and-weather/68-why-do-airplanes-take-longer-to-fly-west-than-east-intermediate
https://en.wikipedia.org/wiki/Jet_stream
https://www.youtube.com/watch?v=3gNkgj9h2oM

https://upload.wikimedia.org/wikipedia/commons/thumb/6/62/Aerial_Superhighway.ogv/800px–Aerial_Superhighway.ogv.jpg

 

立即捐款 支持青協

 

 

我想立即捐贈

支持青協