剛剛過了白色情人節,春嬌於晚上獨自在房中看韓劇,正當播到一幕感動落淚的情境時,「鈴……鈴……」手提電話的來電鈴聲突然響起,春嬌那水汪汪的眼睛看到來電顯示,發現是志明要求視訊。春嬌呆了一呆,本來不想接聽電話以免影響了看韓劇的情緒,但看到電話螢幕上閃著志明英俊的樣子,與劇中的Oppa有點相似,心裏甜笑了一下,最後還是接聽了電話。

「喂,做乜呀?人地睇緊Oppa㗎!」春嬌撒嬌道。
「我咪係你嘅Oppa囉,你嚟咗我屋企偷睇我咩?」
「喂呀~咪玩啦,打嚟做乜啫?」
「冇呀,想同你講我屋企有盒未開嘅朱古力,新年啲姨媽姑姐嚟拜年嘅時候送㗎,睇你要唔要囉!」志明在鏡頭前拿起大大盒的家庭裝朱古力。
「又係朱古力?你情人節嗰日送俾我嗰盒都未食晒呀,而且屋企仲有大把糖未食,再係咁,我就快變肥婆㗎喇!如果仲食埋你嗰盒,真係食長齋都唔掂呀!」春嬌一邊說一邊把鏡頭移到枱上一堆色彩繽紛的糖果。
「肥肥哋咪仲好攬囉!不過你屋企嗰啲糖咁多顏色,應該有好多色素喎!」
「應該係,不過你唔覺得好靚咩?你睇下我依款指甲油嘅玫瑰紅色同依粒糖嘅酒紅色係咪好襯呢?」春嬌一面介紹一面拿著糖果放入口中。
「咪又係紅色!?」完全沒有分「色」能力嘅志明心想……
志明回應:「係幾襯嘅,不過你唔係話食齋咩?有啲色素係嚟自動物㗎喎!」
「吓!?唔係呱?」春嬌驚訝。

「係㗎,其實食用色素可以分為天然同人造色素兩大類。天然色素可以喺植物或者動物上面提取出嚟,好似某一啲紅色色素就係喺胭脂蟲嗰到提取出嚟嘅。」
春嬌繼續驚訝:「吓!?蟲!?咁人造嘅呢?」
「人造色素通常就由煤炭或者石油嘅副產品提煉而成,第一種人工合成嘅食用色素係苯胺紫,由一個英國嘅化學家喺十九世紀嘅時候發現嘅!」
「原來係咁,咁都係食少啲糖喇!」
「其實唔只糖,有好多嘢食同飲品,好似汽水呀或者加工過嘅肉類都有機會用到食用色素㗎!」
「又係喎,我上次焗畀你嗰個蛋糕都有落色素,如果唔係上面個心心邊有咁紅咁靚喎!不過點先知道買返嚟嘅食物有冇色素呢?」
「睇食物標籤囉!好多時都會寫住佢係咩色素嚟,又或者有一個E Number,由E100至E199都係食用色素嚟嘅!例如Tartrazine 檸檬黃個E Number 就係E102喇!」
「咦!係喎,我食緊依隻糖都有呀,你睇!」春嬌向志明展示糖果包裝上的食物標籤。

「喂呀~咁我會唔會有事㗎?」春嬌擔心。
「咁你又唔使咁驚,其實暫時都未有實質嘅證據話食得太多食用色素會有啲咩病,而且佢哋一般都受到監管嘅,所以都算安全㗎!同埋你啲化妝品其實都有加依啲色素㗎啦,唔通你唔化妝咩!」
「咩喎!咁你覺得我化妝定唔化妝靚啲先?」
志明心知不妙:「哈哈!其實除咗化妝品之外,仲有啲嘢都會用食用色素㗎!你估係咩?」
春嬌成功被分心,但想了一會也想不到:「咦~你又嚟考我,諗唔到呀!唔好阻住我睇Oppa啦!收線喇!」
「哦……咁好啦!唔好睇到咁夜喇!」

過了一會,春嬌看罷韓劇,突然想到志明的提問,便到YouTube搜尋了一下「Food Colouring」。之後發現一個自製天然色素的短片,就傳給志明看看:
「喂Oppa,不如下次一齊整天然嘅 Food Colouring 啦!https://www.youtube.com/watch?v=Q0dhvWA5iq4

「叮……叮……」志明回覆了訊息:
「好喎!你仲可以留返啲糖做Paper Chromatography嘅實驗添!https://www.youtube.com/watch?v=P0zVz_nkK9I

「叮……叮……叮……叮……叮……叮……」沒有視訊,但短訊的鈴聲響個不停,看來志明和春嬌又要很晚才捨得入睡了!

 

資料來源:
http://www.cfs.gov.hk/tc_chi/multimedia/multimedia_pub/multimedia_pub_fsf_98_02.html
http://www.wisegeek.org/what-is-food-coloring-made-of.htm
https://en.wikipedia.org/wiki/Food_coloring

 

立即捐款 支持青協

 

 

我想立即捐贈

支持青協