今日天朗氣清,發哥決定帶發嫂去行大帽山,享受一吓半退休嘅生活。雖然發嫂嘅步伐比較慢,但係發哥堅持陪住發嫂,一步一步慢慢行上大帽山山腰。

發哥:「攰唔攰呀?不如我哋喺前面轉彎位休息陣?」

發嫂:「好呀!」

發嫂:「哇!哩度望落去個香港好靚呀!」

發哥:「係㗎!香港唔單止夜景靚,日頭都好靚㗎!嗱!上到嚟大帽山可以望哂成個香港,依家哩邊就係將軍澳啦!」

貼心嘅發哥一邊講解啲地方俾發嫂聽,一邊喺背囊拎支水同隻香蕉俾發嫂補充能量。

發嫂:「咦!隻香蕉仲好綠喎,都未食得。」

發嫂第一次覺得發哥咁粗心大意,突然有種失望嘅感覺。

發哥見發嫂扁哂嘴,即刻拎返隻青香蕉,剝開啲蕉皮,放入口咬咗一啖。

「其實呢,香蕉唔一定要生哂黑色梅花點先食得㗎。你試下哩隻青香蕉同平時嘅有咩唔同?」

發嫂半信半疑,細細啖咬咗一口:「咦!好似無咁甜,仲有啲澀同硬。」發嫂個樣已經表示唔想再食,所以飲咗啖水沖淡下。

「又幾犀利喎!其實香蕉未成熟嘅時候,含有大量抗性澱粉,哩啲抗性澱粉無咁易被消化同分解,所以會令人更容易有飽肚嘅感覺,啱哂我哋行山食。」話口未完,發哥已經食哂成隻香蕉。佢係背囊又拎咗一隻香蕉出黎,不過今次隻香蕉已經黃黃地。

發嫂:「哇!你帶咗幾多隻蕉呀?食咁多小心肥到變豬!」

「唔洗擔心喎,賭神食咁多朱古力都未肥!我食緊嘅青香蕉糖份含量其實比黃香蕉仲低,所以好啱二型糖尿病患者食,飽肚得嚟又唔怕肥。」發哥見發嫂對隻香蕉無咩興趣,於是收返埋佢。

發哥發嫂休息完又繼續佢地登山嘅路。

「不過食青香蕉都有唔好嘅地方。」發哥細細聲係發嫂耳邊講。

「會便秘?」發嫂好驚訝。

「本來抗性澱粉(Resistant Starch)可以被結腸入面嘅細菌發酵同吸收,維持腸道酸性環境,幫助預防大腸癌。不過,青香蕉都含有好多單寧酸(Tannic Acid),會抑制胃腸蠕動,令人容易有便秘哦。」

發嫂:「咁黃香蕉呢?」

「嗱!香蕉嘅成熟程度其實會影響佢包含嘅營養。由青色慢慢變黃色再出黑色梅花點,愈成熟嘅香蕉含腫瘤壞死因子(Tumor Necrosis Factor, TNF)就愈多。」

「腫瘤壞死因子係咩嚟?」

「腫瘤壞死因子其實係一種能夠直接消除腫瘤細胞,但係對正常細胞無明顯毒性的細胞因子。腫瘤壞死因子愈多,香蕉上面嘅黑色梅花點都會跟住增多。所以,食用愈成熟嘅香蕉對我哋嘅免疫功效就會愈高,抗癌效果都會愈好。」

發嫂:「聽落好似食黃香蕉更好咁喎!」

「除咗腫瘤壞死因子,香蕉喺成熟嘅過程中仲會將入面嘅纖維轉化成維生素B同C、鉀,仲有其他抗氧化劑添!對女士嚟講,抗氧化係咪好吸引先?」

「成熟嘅嘢本身就好吸引。」

發哥聽完發嫂咁講,即刻話:「難怪我咁吸引啦。」

發哥發嫂有講有笑咁已經行到去大帽山山腰。「哇!今日無咩雲,可以睇到好遠嘅地方。嗰邊就係荃灣啦。」

「不如我哋喺度野餐放風箏?」發哥一邊講,一邊將佢一早準備好嘅地毯鋪喺草地上面,再係背囊拎返頭先隻黃香蕉出黎俾發嫂。「我又點會唔知老婆鍾意成熟啲呢?」

發嫂:「咦!頭先隻香蕉都未有黑色梅花點㗎啵!你係咪畫上去呃我㗎?」

發哥:「我又點捨得呃你呢!我只係做咗小小手腳,將隻香蕉放咗入紙袋焗住佢,等佢快啲熟。」

「平時啲人唔係放膠袋㗎咩?」

「你都知香蕉會釋放啲乙烯催熟啦,如果用膠袋既話,香蕉減少同氧氣接觸,就會減慢釋放乙烯。紙袋就唔同呢!紙袋疏氣得嚟又可以困住啲乙烯,令隻香蕉快啲熟。」

發嫂好滿意咁接過隻香蕉,剝開啲蕉皮,同發哥你一啖我一啖咁享受隻熟香蕉。

一直以來都以為只有帶黑色梅花點嘅黃香蕉先可以食,原來食香蕉同氹老婆一樣,都要啱Timing先得到你想要嘅,我係話營養呀。下次食香蕉,你哋識揀啦!

 

資料來源:
http://www.onegreenplanet.org/vegan-health/ripe-vs-unripe-bananas-which-are-better-for-you/
http://positivemed.com/2014/09/16/best-time-eat-banana/

 

立即捐款 支持青協

 

 

我想立即捐贈

支持青協