點解啲冰會黐埋一嚿嚿嘅?

夏天來了,天氣愈來愈熱,小新與朋友剛剛玩完《太陽的後裔》家家酒後回家,便立即走到雪櫃中拿出一罐冰凍的可樂,正準備大口一喝之際,突然皺眉並咀角向上戚道:「等等!我係宋仲基嚟架喎,飲嘢點可以咁隨便㗎?我要再cool啲!」隨即打開冰箱想找亮晶晶的冰塊:「呀~~~美訝大嬸,你搞過啲乜嚟呀?唔係原粒冰塊嚟嘅?點解啲冰黐埋咗一嚿嚿咁架?」

「你話邊個係大嬸話?」近來多了幾條魚尾紋的美訝立即轉身怒罵!不過美訝看見眼前在冰盤內的冰塊確實互相黏住,內心雖覺得奇怪,但仍嘴硬地說:「不嬲都係咁㗎喎,要冰嘅咪自己揼碎佢囉!」
「乜嘢都咁隨便,邊有人俾面㗎?我以爺爺嘅名義發誓,我一定要搵到個原因出嚟!」小新突然認真起來。
美訝反眼說:「你又話自己係宋仲基嚟嘅,幾時變咗做金田一㗎?」

廣志剛剛經過便笑道:「小新今次都幾有科學精神喎,不過又唔使打搞阿爺爺嘅,搵你老豆我都知點解啦!因為我地屋企嗰個係無霜冰箱嘛!」
小新嘩然:「吓!三國無雙冰箱,乜原來佢咁勁㗎?」
廣志完全沒有理會小新,繼續說:「所謂無霜冰箱,就係個冰箱唔會結霜。其實冰箱入面有一個加熱系統定期為冰箱升溫,不過只係好少嘅啫,目的就係為咗唔想個冰箱同入面嘅食物結霜。所以,當溫度上升嘅時候,冰嘅表面就會開始融化為薄薄嘅水;但係當完成依個微量升溫之後,溫度又會下降返,表面嘅水就會變返做冰,令兩嚿冰相連,好似條冰橋咁。」

美訝回應:「哦,原來係咁!咁啫係成日開個冰箱,或者打開個冰箱太耐,走晒啲冷空氣,都會令啲冰融喇喎?」
廣志:「都係㗎,所以小新你唔好再喺個冰箱入面扮企鵝啦!」
小新:「咁我扮北極熊囉!」

「重點唔喺依度囉!」美訝繼續發問:「其實,結霜有咩唔好呢?凍啲,食物咪可以保存得耐啲囉?」
廣志解釋:「咁又唔係喎,結霜會影響冰箱嘅製冷系統,同埋探測溫度嘅精確性,令到冰箱裡面嘅溫度唔平均,影響食物保鮮。其實除咗加熱系統之外,當中嘅冷風系統可以帶走冰箱內多餘嘅水份,咁唔單止會進一步減低結霜嘅機會,亦都可以令冰箱入面乾淨清爽,唔會有臭味添!」
小新插咀:「乜你哋講啲嘢咁深奧㗎!?咁我點先可以有一啲原粒冰塊啫?」
廣志得意洋洋地說:「咁就要好似我咁,將啲冰儲存喺個紙袋到啦!」繼而在冰箱的一角拿出一個公文袋,再倒出幾顆原粒冰塊。
小新驚訝:「乜裡面係冰嚟㗎!?我仲以為係美訝嘅私己錢添!」
美訝衝口而出:「我啲私己錢點會放喺個冰箱到喎……er……唔好講私己錢住,點解用個紙袋裝住啲冰,啲冰就唔會黐埋一嚿嘅?」
廣志以懷疑嘅眼望住美訝並解釋:「因為紙袋可以吸走冰表面嗰層水嘛,冇咗層水咯,咪唔會有條冰橋連住啲冰囉!咁你啲私己錢又放咗喺邊呀?」
「哈哈哈!冇呀,邊有啫?」

此時,小新偷偷地拿走廣志的公文袋,一面將當中的冰到處拋擲一面唱:「Let it go~ Let it go~ 啦嗱嗱嗱唔易喎!我就係冰雪女王Ella喇!」
美訝:「係Elsa呀!」
廣志:「依個都唔係重點!小新,唔好亂咁丟走晒我啲冰呀,今晚要用嚟招呼客人㗎!」

 

資料來源:
http://homeguides.sfgate.com/pros-cons-frost-freezers-94327.html
https://en.wikipedia.org/wiki/Auto-defrost
https://en.wikipedia.org/wiki/Icemaker#/media/File:Tubeice.jpg