半生熟牛扒中的紅色液體是血嗎?

為慶祝相識100日,志明一早訂好米之蓮高級餐廳與春嬌燭光晚餐。餐廳的燈光旖旎、音樂柔和,氣氛甚好。志明盡顯平日少有的男士風度,為春嬌拉椅子;還特別預備紅白兩酒,以配合春嬌主菜的選擇。未嚐酒醇已醉人,這份突如其來的細心無微,令春嬌喜出望外。

 

正當兩人沉溺於浪漫之際,不識時務的侍應生打破了溫馨的畫面:「Hi,我叫Waiter,今晚由我serve你哋兩位,等我介紹一下今晚嘅主菜先啦,分別係日本鹿兒島和牛肉眼扒,或者係紐西蘭深海龍蝦配蟹肉帶子,你哋想食啲乜?」春嬌本想向Waiter「戚嘴反眼」,但為了保持優雅和表現溫柔體貼的一面,便向志明說道:「係啦,你今日開完個會都肚餓啦,想食啲咩呀?」志明想了想:「咁不如兩樣都試下啦!你食龍蝦我食肉眼?」春嬌側頭微笑,聳聳肩膀表示沒有所謂。

 

Waiter追問:「先生,咁肉眼扒想食幾多成熟?」

「Medium well呀唔該!」志明回答。

春嬌擔心道:「吓?五成?裏面會生勾勾血淋淋架喎,你sure唔sure?」

「OK呀!咁先好食吖嘛,依到啲牛扒應該冇問題嘅,更何況喺塊扒流出嚟嗰啲實情都唔係血嚟嘅!」

Waiter插咀:「係呀,其實劏牛嘅時候,一般都已經放晒血㗎喇!」

春嬌沒有理會Waiter,雙眼充滿疑問:「吓?唔係血咁係咩呀?」

「其實嗰啲係藏喺肌肉細胞入面嘅肌紅蛋白(Myoglobin),係血紅蛋白(Haemoglobin)啲friend。兩者都係用嚟儲存氧氣,不過佢對氧氣嘅親和力(Oxygen affinity)比血紅蛋白仲要高,所以肌肉先會吸引同儲存到更多嘅氧氣嚟進行呼吸作用,從而製造出更多能量!同血紅蛋白一樣,肌紅蛋白含有鐵質,所以都係紅色嘅。That’s why一般人就以為嗰啲係血囉!」

「咁熟晒就無㗎嗱?」

「都係㗎,一來煮得太耐啲水份就會冇晒,二來肌紅蛋白入面嘅鐵質就會被氧化,變成啡啡哋色,所以就察覺唔到囉!」

 

「哦!原來係咁!但係點解通常牛扒先會有依啲好似血水嘅肌紅蛋白流出嚟嘅?」

Waiter再插咀:「因為係紅肉囉!」

志明一樣沒有理會Waiter,繼續回應:「其實羊肉都會咁樣㗎!一般嚟講,肌肉越強壯,就越需要更多能量去維持活動,所以存有肌紅蛋白嘅數目亦都越多,令到舊肉紅卜卜,我地稱之為紅肉。」

「咁即係我哋平時叫嗰啲白肉,好似魚呀,同埋我將會食嗰啲海鮮咁,就係冇咁強壯嘅肌肉,所以少啲肌紅蛋白?」

「叻女!可以咁講啦!」

「咁豬肉呢?粉粉哋色,係紅肉定係白肉呀?」

「通常都算係紅肉嘅,不過科學啲咁睇嘅話,就要知道嗰舊肉含有幾多percent嘅肌紅蛋白先得喇!可能如果隻豬仔好似你咁懶,又白雪雪嘅,咪係白肉囉!」

春嬌「嘟咀」反駁:「你先懶呀!平時一放假就留喺屋企打機!」

志明谷起厚厚的胸肌,笑道:「咩呀,睇清楚啲!我咁大隻!一定係紅肉啦!」

 

Waiter可能等得太久,亦忍不了他們的打情罵俏,唯有悄悄苦笑地離開現場,並深信他們吃著甚麼也是甜!Happy Anniversary!

 

資料來源:

http://www.todayifoundout.com/index.php/2010/04/the-red-juice-in-raw-red-meat-is-not-blood/

https://en.wikipedia.org/wiki/Myoglobin

https://en.wikipedia.org/wiki/Red_meat