有一日,大明同小明喺條街度行行吓,小明隻腳踢到路邊嘅野草,之後佢見到棵草即刻縮埋咗,就好得戚咁話喇:「你睇我幾犀利!掂一掂棵草佢就縮埋咗,連啲草都怕咗我呀!」大明望一望啲草之後就話喇:「佢唔係剩係怕你,佢係咩嘢都怕嘅怕醜草呀!」

小明:「怕醜草!?」

大明:「係呀,佢嘅本名係「含羞草」,原產地喺美洲熱帶地區,但由於生長條件簡單,傳播力強,依加世界各地好多地方都好常見。而佢最大嘅特點就係佢非常之敏感,受到外界嘅觸碰或者刺激,佢嘅葉片就會一片一片咁閉合,而葉柄更加會向下方垂低,好似好怕醜咁。」

小明:「點解嘅?點解嘅?」

大明:「因為佢葉柄嘅底部有一個組織叫做「葉枕」,葉枕入面本來充滿水分,做成嘅水壓支撐,葉片先至會挺直伸展。但係當受到外界觸碰或者刺激嘅時候,怕醜草會將葉枕入面嘅水分排出,由於失去咗水壓,葉柄同葉片部分就會垂低同閉合,但係過多一陣,當水分返返去葉枕嘅時候,佢又會打返開架喇。」

小明:「掂吓都唔得,真係怕醜呀!」

大明:「呢個只係怕醜草保護自己嘅機制,當草食性動物見到佢收縮,就會以為佢已經枯萎,咁就唔會食佢喇。其實佢一啲都唔怕醜呀,因為佢生長條件簡單,而且傳播同生長速度都好快,阻礙到其他物種繁殖,有啲地方好似美國、坦桑尼亞咁,已經視佢為入侵物種,啫係話佢已經對當地原生嘅植物構成威脅喇!」

 

小明:「嘩~睇佢怕怕醜醜咁原來咁犀利!」


資料來源:https://en.wikipedia.org/wiki/Mimosa_pudica

 

立即捐款 支持青協

 

 

我想立即捐贈

支持青協