春天先嚟落葉?唔通連個天都唔鐘意我?

大家有無發現最近路上多左枯黃嘅落葉,明明已經「春回大地」,點解會同印象中嘅季節轉換咁唔同嘅?

其實係同香港嘅氣候有莫大嘅關係,香港位於亞熱帶地區,常見樹木都以熱帶及亞熱帶植物為主,而漁護署種植嘅主要本土品種大部份都屬於「常綠喬木」。「常綠樹」可以抵禦唔太寒冷嘅冬天並保持常綠,所以秋冬季節都唔會換葉。

但係到春天長出新葉嗰時,樹汁產生嘅水壓令葉柄細胞形成「木栓層」,唔單止可以切斷樹汁繼續進入舊葉脈嘅管道,仲可以防止葉落後病菌由「傷口」入侵樹木!舊管道被「切斷」後,樹汁集中輸送養份俾新葉芽,而舊葉接收唔到養份後,葉柄變得又乾又脆,只要一陣風吹或自身重量都足以令舊葉「落葉歸根」。所以喺四季分明嘅北方,落葉表示秋天嘅蒞臨,而喺氣候相對溫和嘅香港,卻代表春天嘅到來。

創新科學中心
https://ccst.hkfyg.org.hk/
創意科藝工程計劃
https://lead.hkfyg.org.hk/